Pyrshah CAA ka thain Nongpoh bad dawa ILP

Nongpoh: Ki la don da ki hajar ngut ki paidbah kiba kynthup naduh ki nongialam sengbhalang, ki seng longkmie bad seng samla shnong, ki la iasnohktilang bad iamih paidbah ha ka jingiaiaid paidbah kaba la pynlong da ka Seng Samla Shnong Nongpoh Proper, na ka bynta ban pynsawa jam ia ka sur jingpyrshah ia ka Citizenship Amendment Act (CAA) bad kiba la pyrta shla ba ban pyntreikam noh ia ka ILP hapoh ka jylla. 

    Ha shwa jong katei ka jingiaiaid paidbah ha Nongpoh, ki nongialam ka SSS Nongpoh Proper, kham mynsngi ka la don shwa ka jingiasoi paidbah ne ka Signature Campaign, ha kaba ki la don da ki hajar ngut ki paidbah ka thain Nongpoh, ki la wan ban iashimbynta shitrhem na ka bynta ban pyrshah jur ia ka CAA bad ruh ban dawa na ka sorkar ba ka dei ban pyntreikam mardor noh ia ka ILP hapoh ka jylla.

     Haba iadei bad ka jingiaiaid paidbah, nalor ki seng Longkmie bad ki Seng samla na ki shnong ka thain Nongpoh, la wan iashimbynta ruh da ki nongialam jong ki sengbhalang, kiba kynthup ia ka KSU, FKJGP, HNYF, RBYF, HYC lem bad kiwei, ha kaba ki la pyrta shla bad pynrem jur ia ka CAA bad dei ban pyntreikam noh ia ka ILP.
      Kiba la don mynta ka janmiet, ki la sdang ia ka jingiaiaid paidbah na Nongpoh Centre Gate sha DC Junction bad nangta pat ki la phai biang sha kajuh ka jaka bad kiba la pynlong biang ia ka jingialang paidbah, na ka bynta ban pynshai paidbah halor ka jingma kaba ap ia ka jaid bynriew Khasi na katei ka CAA bad ha kajuh ruh ka por ban dawa na ka sorkar jylla ba ka dei ban pyntreikam noh ia ka ILP, khnang ba kan iada ia ka jingwantuid ki briew kiba nabar.
      Haba shim kyllum lang ia ka jingkren naduh ki seng Longkmie, Seng Samla bad Sengbhalang, la iohsngew ia ka sur ba ki la dawa tyngeh ia ka sorkar jylla bad kiba la pynpaw ruh ba ha kaba kum kane ka por, ki dei ban iatylli na ka bynta ban pynbor ia ka sorkar jylla ba ka dei ban pyntreikam noh mardor noh ia ka ILP hapoh ka jylla Meghalaya.
     Ha kawei pat ka liang, ki nongialam ka Seng Samla Shnong Nongpoh, ki la pynpaw ia ka sur ba lada ka sorkar jylla kan dang pynslem ha ka ban pyntreikam ia ka ILP hapoh ka jylla, na ka liiang ki samla ka Nongpoh Proper, kin sa pyntreikam noh hi dalade ia ka ILP.
     Kiba la donlang ha kane ka jingialang paidbah, ki kynthup ia u Samla Ferdynald K Kharkamni, President ka KSU NKHD, u Bah Bipul Thangkhiew, President ka RBYF, u Bah Marcus Marten, President ka HNYF, u samla Anthony J. Suchiang, President ka SSS Nongpoh Proper, u samla Jayson Lenox Nongrum, Vice-President ka HYC lem bad kiwei kiwei.