Pyrshah ban ri mrad ha khlaw Narpuh

Shillong, 28 Nailur:
Ka Joint Action Committee jong ki shnong, ki ban shah ktah na ka jngthmu ban ri mrad khlaw ka sorkar ha ki bynta jong ka Narpuh, ka la rong hynnin ka sngi, ha Shnong Tongseng, ryngkat ka jingdonlang jong U Bah Erwin K. Syiem Sutnga, bad ki Rangbah Shnong /Secretary Shnong bad katto katne ki riewpaw khmat jong ka thain.
Ka jingialang, ka la rai ban pyrshah jur ia ka jingthmu jong ka tnat khlaw ban pynlong (declare) ia ka Eco Sensitive Zone ha ka jaka jong ki riew shimet ne jong u paitbah. Ka jingpyrshah ia kane ka jingthmu jong ka Wild Life ka long ba ka ktah haduh katta katta ia ka trei ka ktah, jaka rep jaka riang bad ia ka jingim jong ki paid nongshong shnong ka thain Narpuh. Kaba ar ka long ba ia katei ka jingthmu ban pynlong ESZ la long hok long trai da ki Nongshong shnong hapoh ka jingpeit jong ka JHADC ( Jaintia Hills Autonomous District Council ) katkum ka VI (6) Schedule jong ka Indian Constitution. Bad lada ai lad ia kum kane ka jait jingthmu jong ka Wild Life khlem pep ki nongshong shnong jong ka thain Narpuh kin shah teh mraw ha la ka jong ka jaka puta namar yn hap iaid lyngba ba bun ki kyndon ain jong ka ESZ. Te kum ka Joint Action Committee bad ka Thain hi baroh kawei ka ieng pyrshah, ia kane ka jingthmu (Proposal) bad wat tang shi inche da lei lei ruh em ngin nym ai ia ka jaka ba long hok long trai da ngi ki paitbah sha ka Wild Life.
Bad lada kane ka jingthmu jong ka Sorkar lyngba ka Wild Life Depart ka thom da ka bor ban iaid shaphrang ban pynlong (Declare) Eco Sensitive Zone ha ki jaka puta ba long hok long trai da u paitbah ka Joint Action Committee ryngkat bad u paitbah ka thain kim banse ban rah lama iong ne ban ujor shaduh ka Supreme Court.