Nongpoh:Hynnin ka sngi Saitjain, kaba dei ka sngi kaba la thmu ban plie paidbah ia ka Nar-ang sub centre, hynrei ki paidbah nongshong na ka shnong Niangbari Them, kaba kynthup naduh ki longkmie longkpa lem bad ki khun samla na katei ka shnong, ki la leit tur kynsan hapoh ka Sub Centre kaba don hapoh katei ka shnong, kata na ka bynta ban pyrshah jur halor ka kyrteng jong katei ka Sub Centre, namar ba katei ka sub centre ka dei kaba don hapoh ka shnong Niangbari Them, katba la ai da kata ka kyrteng kaba la tip kum ka Nar-ang sub centre.
Nalor katei kaba ki pyrshang halor ka kyrteng Nar-ang sub centre hapoh ka shnong Niangbari Them, ki paidbah na katei ka shnong, ki sngew pyrshah ruh halor ka jingbym iohkam ki samla na katei ka shnong hapoh katei ka jaka sumar, ha kaba ki la ong ba wat ia ki kam kiba rit ba ria, la wan trei lut da ki briew kiba na kiwei ki jaka, katba ki samla hapoh katei ka shnong ki hap long tang ki nongpeitkai.
Ha katei hi ka sngi, ki samla na katei ka shnong, ki la pyndap noh ia ka kyrteng Nar-ang sub centre, ha kaba ki don jingthmu ban pynkylla noh sha ka kyteng Niangbari Them sub centre, namar ba katei ka jaka kaba la tei ia katei ka sub centre, ka dei hapoh u pud u sam ka shnong Niangbari Them.
Haba iadei bad ka jingdawa pynkylla kyrteng ia katei ka sub centre, ki seng samla bad seng Longkmie na ka shnong Niangbari Them, ki la aipor 2 Taiew ia ka sorkar ba ka dei ban pynkylla kyrteng noh ia katei ka sub centre, kata na ka Nar-ang sub centre sha ka Niangbari Them sub centre. Ha kaba ki la byrngem ba lada ki briew kiba don ha ka bor kim lah ban pynkylla kyrteng, kaba mut ba ki paidbah na katei ka shnong, kin sa leit khang tala ia katei ka jaka sumar.
Phi don ban ong eiei?