Pyrshah ain shongwai ka thain Riwar

Shillong, 6 Naiwieng:
Ka jingialang jong ki Khlieh Nongsynshar ka thain Riwar Pynursla, ki la rai ban pyrshah ia ka ain shongwai iing ba la pynkhreh da ka sorkar ban pynlong ain ha kane ka jylla.
Haba pynlait khubor myntq ka sngi, u nong ialam ka synjuk ki khlieh nongsynshar ka thain Riwar mihngi u Bah Midford Ryngksai u la ong ba kane ka ain shongwai iing jong ka sorkar kam iahap satia namar ba ka la ktah ia ka bor jong ki rangbah shnong, bad ka shnong ka thaw. “ngi la rai ban kyntait ia kane ka ain shongwai jong ka sorkar”, la ong u Bah Mid.
U la ong ba ha kane ka jingialang kaba long mynta ka sngi, la shim ia ka rai hadien ba la iatai sani bha ia kane ka ain ba ka sorkar ka thmu ban thaw da ka jingthmu ban tehlakam ia ka jingwan rung ki briew nabar.
“Ynda la iatai, ia pule, ngi la rai ban kyntait mardor ia kane ka Tenancy Bill bad kyntu ruh ia u myntri rangbah ka jylla u Mukul Sangma ba un khot iakren sngewthuh jingmut bad ki sengbhalang kiba pynlong ia ka jingiakhih ha kane ka jylla” ong U bah Ryngksai.
Lah ban kdew ba ka synjuk jong ki rangbah shnong na sor bad khapsor ruh ki la pyrshah ia kane ka ain shongwai jong u Mukul da kaba ong ba kam dei ka ain kaba bha. Ki la ong ba lada ailad ia kane, ka ain ki bor shnong kin long tang ki nongpeitkai ha kaba ka bor baroh ka shong ha u Deputy Commissioner bad kata ka Task Force.