Pyrkhing tyngeh ka sorkar pdeng ha ki khappud, ong u myntri

Shillong, 6 Nohprah:
U Myntri khynnah ka tnad kam pohiing ka ri u Haribhai Parathibhai Chaudhary u la ong ba ka sorkar pdeng bad ka jingiatreilang bad ka sorkar jylla kin pyrkhing tyngeh ia ki khappud ban khang lad ia ka jingwan rung ki riew pyntriem nabar ri.
Haba kren ha ka jingsam syrnot sha ki pulit ka North East Police Academy (NEPA) ha kane ka sngi Saitjain, u Chaudhary u la ong, “Ka bor pyniaid ia ka khappud ka la kham pynbha ban tehlakam ia ka jingwan rung ki briew nabar”.
Katkum ka jingong u myntri, ka sorkar pdeng ka la shim khia ia ki khappud ban kern oh khnang ban khang lad ia ki kam sniew. Nalor kane, ka sorkar ka la pynbiang ruh ia ki tiar kiba kham biang ban khang lad ia ki riew pyntriem.
“Ka sorkar ka la shim ruh ia ki lad ki lynti ban pynjem noh ia ki kam pyntriem kiba thmu ban pynthut ia ka suk ka sain” u la ong.
U la ong ba ka dong mihngi ka dei kaba shah ktah bha ha ki kam pyntriem bad ka long kaba donkam ban don ka jingshaniah bad ka jingiatreilang bad ki paidbah ban wanrah ia ka jingsuk ha kane ka thain.
U la ong ba ha kine ki sngi ki riew runar ki dei kiba la nang la stad bad kane ka long kaba donkam bha ia ka sorkar bad ki paidbah ban khang lad.
“Ka jingmih ki buit stad bapher bapher ka la pynlong ia ki riew sniew ban ioh lad ban leh ia ki kam pyntriem kum ki tiar siat bad kiwei de”, u la ong.
U Chaudhary u la ong ba “ki pulit kiba katkum kane ka juk ki dei ban ai ia ka jubab kaba biang sha ki riew sniew kiba thmu ban pyntroin ia ka jingsuk bad ka jingshngain ka ri.
U la ong ba ha ka 12th Five Year Plan, ka tnad kam pohiing ka ri, ka la mang T. 98.64 klur ban pyntreikam ia ka skhim ban pynkhlain ia ka NEPA Shillong.
“Nga sngew kmen ba ki 71 ngut ki Dy SP ki la shah pynhikai dang shen sha Singapore. Ngi pyrshang ban pynthikna ba kum kane ka jingai jinghikai kan bteng ha ki sngi ban wan”, u la ong.
Mynshem snem ka tnad kam pohiing ka la mang T.1 klur ia ka Normal Welfare Grant (GIA) ia ki pulit ka NEPA.
Ha u snem 2015-16, u myntri u la ong, “Nga pynbna ba T.2 klur kum ka Grant ban iarap ia kiba shah hikai bad ki nongtrei ka NEPA”.
Ha kane ka sngi, ki don 230 ngut ki pulit jong ka 41st batch kiba pyndep ia ka jingai jinghikai ka NEPA.
Na kine, 71 ngut ki dei ki Deputy Superintendent of Police (Dy SP), 159 Sub Inspector – 47 na Meghalaya, 5 na Arunachal Pradesh, 11 na Mizoram bad 167 na Manipur.