Jowai: Na ka bynta ban iada ia ka jingwan pur u Khniang jingpang na ri Bangladesh, na ka liang u Deputy Commissioner ka East Jaintia Hills u la pynjari da ka section 144 CrPC ha ryngkat ka kyndon jong ka Meghalaya Epidemic Diseases , COVID-19 Regulation , 2020 la khang pyrshah ia ka leit ka wan ki paidbah ha baroh shi lynter ki khappud hapdeng ka India bad Bangladesh ha East Jaintia Hills.
La khang pyrshah ruh ban kam sha shiliang pud lane wan rung shapoh India. Ka hukum u District Magistrate ka EJH ka khang pyrshah ruh ia ki kam khaii tuh ia ki masi, ki kam kiba be-ain kiba kynthup ia jingkhaii ia ki kynja jingdih buaid, ki mar kiba kynthup ia u Kwai, Tympew, Biri Sikret, Shini slasha bad kiwei kiwei ki mar.
Na ka liang u DM ka EJH u la pynpaw ruh ba wat lada ki BSF ki la trei shitom ban pyrkhing ha ki thain khappud, khamtam ha kaba iadei bad ka jingiakhaii tuh ia ki Masi bad kiwei kiwei ki mar, kin iai pyrkhing shuh shuh ha kane ka por khnang ban iada ia ka jingwan pur u Khniang jingpang Covid 19 na sha Shilliang u Pud ka ri Bangladesh.
La iathuh shuh ba katkum ki jingtip ba la ioh da ka Ophis u DC ka EJH, ka jaka kaba hap hapoh ka jingpeit ki 97 Bn jong ki BSF kadei ka thain kaba jur bha ki kam Khaii tuh bad kine ki nongkhaii tuh ki lah ban wanrah ka jingma ka ka District bad kumjuh ia ka jylla.
U DM ka EJH u la maham tyngeh ruh ia kito kiba rah tiar pynmynsaw kiba kynthup ia ki petrol bomb, ki lathi, ki bom patakar nalor kino kino ki jingialeh pyrshah ia ki shipai BSF kiba iada ha Khappud. Ka iaid ka ieng ki paidbah ha khappud lada da kjat lane da ki kali la pyrkhing tyngeh naduh ka por 6pm 6 am.
Hynrei ia ka iaid ka ieng jong ki paidbah shapoh u pud u sam ka ri India la pyllait na katei ka jingpynrkhing na ka bynta ba kin ioh ban thied ia ki mar bam ba kongsan naduh ka por 10am haduh 1pm bad na ka bynta kito kiba wan sha Khliehriat na ka bynta ki mar rep la pynjynsur naduh ka por 7am haduh 6pm.
La bthah ia ki shnong ba ki pyntrei kam pura ia ki VDP lane ki Volunteer ban pyntikna bad kan nymdon kano kano ka jingpynkhein ia ki kyndon jng ka sorkar India.
Shuh shuh u DM ka EJH u la ong ba tang uwei lane ar ngut na kawei ka longing ki lah ban mih na la iing ban leit siew ia ki jingdonkam la ki marbam ba kongsan lane ki mar rep.
La maham jur ruh ia kito ki riew shim kabu kiba die rem ia ki mar ki mata hapoh ka District. La kyntu ia ki paidbah ban ialeh pyrshah ia ka jingshim kabu ki riew shim kabu.
Na ka liang u DM u la kyntu ia ki paidbah ban bud bin bin ia ki kyndon iada na u Khniang jingpang da kaba ia jngai uwei na uwei pat bad ban leh khuid da kaba sait ia ki kti bun sien ha ka shisngi nalor kiwei kiwei ki lad iada ba la btah da ka sorkar bad la tnad ka koit ka khiah.
Phi don ban ong eiei?