“Pynursla, Sohra bad Shella, kum ka South East Khasi Hills District”

Shillong, 18 Lber:
U MLA ka Sohra u Bah Titosstar Well Chyne u la ong ba ka thain Pynursla, Sohra bad ka Shella ki dei ban ai noh ban long kum kawei ka district ka ban tip kum ka South East Khasi Hills District.
Haba shim bynta halor ka jingiatai halor ka jingkren mang tyngka jong u Myntri Rangbah ka jylla hapoh ka iing dorbar mynta ka sngi, u Bah Titos u la ong ba kine ki jaka ki la biang bha ban ioh ia ka district haba pynshong nongrim ia ka jingheh ka jaka, ka jingdon briew nalor kiwei ki jingdon kam.
“Ka Sohra ka la dei ka Civil Sub-Division kaba la thaw naduh u snem 1978 kaba la rim tam ha ka jylla. Lada ngi shim lang ia ka Shella-Bhola ganj, Laitkroh bad Pynursla C&RD Block ka jingdon jong ki nongshong shnong ka la kot sha ka 1.40 lak ngut ha kine ki lai tylli ki Block bad palat 26 hajar ki tnum iing”, la ong u MLA ka Sohra.
“Nga dawa ba ka sorkar ban pynlong noh kum kawei ka district ia kine ki lai tylli ki Block khnang ban wanrah ia ka jingsynshar bad ka roi ka par sha tyngkong iing jong ki paidbah”, la ong u Bah Titos.
Nalor kane, u MLA ka Sohra u la ong ba ka sorkar ka la dei ruh ban pynkiew kyrdan noh ia ka Laitlyngkot PHC sha ka CHC ha ka kyrteng jong u myntri rangbah barim bam kwai ha duwar Blei u Bah BB Lyngdoh uba dei na kane ka shnong.
U la kyntu ruh ban thaw ia ka PWD Sub-Division ia ka thain Laitlyngkot bad ban buh ia ka Police Outpost ha Mawjrong khnang ban ai ia ka jingshakri kaba kham jan bad kham paka sha ki paidbah jong ka thain Sohra.
U la ong ba ha ka jingshisha, ka sorkar ha u snem 2012, ka la don ka jingiakren bad iarai ban buh noh ia ka Police Outpost ha katei ka jaka hadien ba la mih ka jingpyniap briew ha ka Sohra tang namar ka jingsuba menshohnoh bad ka jingbuh ia ka Police Outpost kan ai ia ka jingshngain ia ki paidbah ban don ka jingiajan bad ka tnad pulit ban pynneh ia ka suk ka sain haba don kano kano ka jingjia bad ban tem ia ki kam sniew.
Ha kawei ka liang, u MLA ka Sohra u la dawa ba ka sorkar jylla ka dei ban pynbna noh ia ka Rangjyrteh kaba don ha jan Laitduh ka Shella konstitwensi kaba dei ka jaka sain nar kaba naduh hyndai.
“Ia kane ka jaka dei ban pynbna noh kum ka Jaka Hyndai ( Heritage Site) kaba dei ka jaka kaba donkam bha naduh hyndai bad pawnam bha ia ka jingsain nar”, la ong u MLA ka Sohra.