Pyntuid jakhlia na Ri Kanaan sha Umeit

Nongpoh: Haba pynpaw ia ka jingpyrshah kaba jur halor ka jingpyntuid jakhlia sha Wah da ka Ri Kanaan Resort kaba don ha shnong Umeit ha Ri Bhoi, hynnin ka sngi na ka liang ka Seng RBYF, Eastern Zone, ka la leit ban kynduh DC ha ryngkat ka Dorkhas ban pyrshah jur halor katei ka kam pynjakhlia wah da katei ka Resort.
Ha ka kyrwoh kaba la phah da u Bah Wanpher S Wahlang, Publicity ka RBYF, Sengkmie, la ong ba ka nongrim kaba la pynlong ia ki dkhot jong katei ka RBYF, Eastern Zone ban leit ujor shaduh DC, ka dei hadien ba ki la lap ba katei ka Resort, ka pyntuid ia ki jakhlia bad painkhana sha ka wah kaba don hajan jong katei ka Resort.
U la ong ruh, ba ka seng ka la lap ba ka jingpyntuid jakhlia da katei ka Resort, ka la pynjaboh ym tang ia ka mei Mariang, hynrei ka la pynjaboh ruh ia katei ka Wah kaba don ha katei ka shnong bad kaba dei ruh ka Wah kaba ki paidbah jong katei ka shnong ki pyndonkam ha ka sait ka khlieng.
Halor ka jingujor da ka seng sha ka DC, la iathuh ba na ka liang ka DC, ka la kular ban shimkhia bha halor katei ka jingpyntuid jakhlia sha wah da katei ka Resort.
Nalor ka jingujor sha ka DC, la ong ba na ka liang ka seng ka maham jur ia ki nongpyniaid jong katei ka Resort ba kim bit shuh ban pyntuid jakhlia sha katei ka wah, namar nalor ba ka la ktah jur ia ki paidbah ha katei ka shnong, hynrei ka ktah ruh wat ia ka mariang, pynkut ka kyrwoh na u Bah Wanpher S. Wahlang.