Bah RM Shabong
Ka jingjia ha ka shnong Umwali, kaba don ha ka thain Langpih, ka la wan rah biang ia ka kam pyntieng koh tympan, kaba shyrkhei bha kaba la leh da ka Assam, ia ki trai shnong jong katei ka thain bad kata ka long ba ki leit kurup ia ki jaka puta jong ki trai shnong, khlem da ioh jingbit bad kam dei tang kata, hynrei la iohi ba ki pulit Assam, ki byrngem byrsit wat ia ki kynthei khynnah.
Ka jingjia ha Umwali, ka la pyni shai namarkata ba ka Assam, ka don beit beit ia ka thong jongka, ban pynhiar kput, ban pynher syrngiew ia ki paidbah jong ka thain bad katei hi ka thew beit ba ki trai shnong, kim dei ban ialeh pyrshah, lane kin hap ban phet krad noh bad ban kylla poiwir ha la ka Ri.
Haduh mynta, ngim shym la iohi, ia kaei kaba ka sorkar Jylla, ka kren ia kane ka phang bad kaba u myntri kam pohiing ba thymmai, u kren ia kane ka mat, hynrei ka jingjia kaba la jia ha katei ka thain, ka dei kaba baroh ki sengbhalang, ki nong mihkhmat paidbah lem bad ki nongialam sorkar, ki dei ban pynrem tyngeh tyngeh bad ka daw, ka long ba katei ka jingleh, kam thew shuh ba ka dei ka kam ia kajia pud, hynrei ka dei ka kam pynhiar kput bad kaba thew ruh (imat) wat ban pynmynsaw ia ki riew paidbah, ki bym don tiar iada eiei ialade.
Ka jingthombor ne leh khor ia ki riew paidbah, ka dei namarkata, kaba ka tnat ba peit ia ka long briew man briew jong ka sorkar India, ka dei ban tangon tyngeh, namar ba kum kitei ki pulit Assam, kiba byrngem sa ia ka kynthei briew, ki dei ban shah tian bishar ha ka tnat ba peit ia ka hok longbriew ki kynthei jong katei ka thain bad ka Women Commission, ha kaba kum kane ka por, ka dei ban sei ia la ka jong ka sur bad kam dei ban ap, ban da don ba kynshuit.
Ka jingleh jong ka Assam, ha sawdong ka Ri Khasi Jaintia, ka pyni shai ba kam dei ka jing ia kajia pud, namar ba haba ia kajia, ka don ka jing bishar; hynrei kane ka jingleh, ka dei beit beit ka jing thombor bad ka jingthmu hi ruh ban pyn shong syier ia ki riew paidbah, ki bym don nong iada satia.
Ka sorkar Meghalaya, ka dei namarkata ba kan kren shai noh, la ka don ha ka jing ia kajia kam pud bad ka Assam, ne ka la shah dakhol ki jaka ki puta jongka bad lada ka la shah dakhol, ka dei ban kynriah jngai noh ialade bad ailad ba ka Assam, kan kam trai sha ki jaka kiba ka sngewbit.
Phi don ban ong eiei?