Nongpoh, 28 K’lyngkot: Na bynta ban iaid beit iaid ryntih kane ka Ilekshon jied nongmihkhmat sha Khasi Hills Autonomous District Council (KHADC) ba mynta u snem, u District Magistrate ka Ri Bhoi, katkum ka kyndon ain 163 jong ka Bharatiya Nagarik Suraksha Sanhita, 2023 kaba la pynkup ia u, la pynbna ba naduh mynta ka sngi, la pynjari ia ka Model Code of Conduct ha ryngkat ki kyndon kiba la pyrkhing bha bad ka ban sa treikam haduh ban da kut ka Ilekshon MDC.
Lyngba ka jingmaham na u DM ka Ri Bhoi, la maham pyrshah ia ki briew ba kin rah ia ka pisa kaba T. 50 hajar shaneng, nangta ka Ksiar ne Rupa khlem ki kot ki sla ne ki jingpynshisha kiba biang, nangta kaba tah ia ki posters ne ki kot, kaba pyni ia ki dur ba la ot shiteng, ban buh ia ki banner ha ki jaka paidbah ne shimet khlem da ioh ia ki jingbit, la khein ba ki long beain bad kin sa ngat ha ka jingshah pynshitom kiba katkum ki kyndon ain.
nalorkata , la pynmih ruh ia ka hukum ban khang pyrshah ha ka ban ran ia kino kino ki tiar pynmynsaw kiba long kum ki tiar siat lem bad ki tiar pynbthei. Hynrei kane ka ain kan ym treikam ia ki briew ka ain, kiba kynthup ia ki Pulit, ki Home Guards, ki briew ka tnat khlaw, BSF bad ki briew CMPF. La kyntu ruh ia baroh kito ki ki briew kiba don ia ki tiar siat ba don listen, ba kin leit aiti noh sha ki thanad ba marjan.
Kane ka hukum kan treikam naduh kane ka jingpynbna bad ba kan sa treikam beit haduh ban da kut kane ka Ilekshon Paidbah sha ka Khasi Hills Autonomous District Council, 2025.
Phi don ban ong eiei?