Pyntreikam ka BSNL da ka internet kaba sted ha sor

Shillong, 12 Nohprah:
Ka Bharat Sanchar Nigam Limited (BSNL) ka la pyntreikam ia ka “Fiber to the Home (FTTH)” ha Shillong ha ka sngi Palei. Kane ka dei ka kor internet kaba sted bad kaba khlain bha ha kaba ki briew ki lah ban iakren lyngba ka video, iakren bad phah jingthoh ruh ha ka rukom kaba sted bha.
Kane ka projek ka kot sha ka jinglut kaba long T. 1.5 klur bad ia kane ka FTTH la pynlait paidbah da u myntri ka tnad Information and Technology u Bah AL Hek bad ka myntri ka tnad Urban Affairs kong Ampareen Lyngdoh ha ka jingialang kaba long ha kane ka sngi Palei.
Ka FTTH ka dei ka buit jingstad kaba pyntreikam da ka BSNL, kaba thmu ban ai ia ka network kaba khlain bad kaba sted bha ia ki nongpyndonkam ia ka kor internet. Lyngba kane lah ban leh ia ka voice, video conferencing katkum ka jingdonkam jong ki nongpyndonkam internet, la ong ki heh ka BSNL.
Na ka liang u Bah Hek uba pynlait ia kane, u la kyntu ia ka BSNL ba kan pyniar ia kane ka jingtreikam shaduh ki jaka nongkyndong khnang ba kan long ka jingshakri kaba kham biang bad kham paka.
U Chief general manager ka BSNL u DP Singh u la ong ba ka dor jong kane ka FTTH kan long kaba tad bad kan long kum ka dor jong ka jingsted jong ka broadband. U la iathuh ba kumba ka long mynta, kane ka projek la pyntreikam tang ha sor Shillong bad hadien lah ban pyniar shaduh kiwei ki bynta jong ka jylla.