Pyntrei biang ia ka jingkieng Kuriliya, dawa ka PRBDC

Shillong, 11 Lber:
Ka Pangam Raliang Border Development Committee ka Committee kaba kynthup ia ki saw tylli ki sengbhalang (FKJGP JH, JYF, HNPF bad ka JSU ha ryngkat ki Rangbah Shnong bad ki nongshong shnong jong katei ka thain) ka buh ia ka jingdawa na ka Sorkar Jylla ba dei ban pyntrei beit sha khmat iaka jingkieng ha Kuriliya da kaba ai ruh ia ka jingiada ia ki Nongtrei na ka tnad kam poh iing jongka jylla.
Ka long ka ba sngew khia haduh katta katta, ban iohi ba ka jingtrei ia kane ka jingkieng kaba pyn iasoh ia bun tylli ki Shnong kiba don ha ka thain khappud bad ka jylla Assam, ka la sangeh noh haduh mynta, wat lada na ka liang ki bor District jongka West Jaintia Hills, ki la dep hiar sha kane ka jaka, hadien ba la wan ban pynsangeh jubor da ki pulit Assam.
Ka Pangam Raliang Border Development Committee, ka la kynthoh ruh ba lada ka sorkar kam lah ban pyniaid shakhmat ia ka jingtrei biang ia kane ka jingkieng, ka pyni ba ka sorkar jylla,  kam don satia ka jingbah khlieh na ka bynta ki para doh para snam kiba im ha ri lajong ha kitei ki thain bad ruh ka pyni ba ki nongialam hapoh ka sorkar ki long kiba tlot bad kiba tieng pyut.
Ka Pangam Raliang Border Development Committee, ka dawa na ka sorkar ba ka dei ban pyntrei beit shakhmat ia kane ka jingkieng da kaba buh da ki lad jingiada na ka tnad pulit, namar kane ka dei ka hok bad ka khyndew ka shyiap jongka jylla bad ka jaitbynriew.
Ka Pangam Raliang Border Development Committee kan sa shong pyrkhat ha kane ka taiew ban wan ban shim ia ka rai halor kane ka jingkieng lada ka sorkar kam lah ban pyntrei biang ia kane ka jingkieng, pynkut ka khubor na u Secretary ka Committee uba dei ruh u president ka JSU.