Pynthikna biang U Rahul Gandhi, ba ka Congress kan hap wad nongialam da uwei pat

U Rahul Gandhi, President jong ka seng Congress, ula kren shai mynta ka sngi, ba ula dep rai skhem, ba un hiar shuki noh ialade kum U President jong ka seng Congress bad ba ka seng, kan hap ban wad ia uwei pat u nongialam uba thymmai ban bujli ha ka jaka jongu, ong ka khubor jong ka NDTV.

La iathuh ba U Rahul, ula kyntait ban ia kynduh bad ki MP, kiba dang shu jop bad kiba kwah ban ia kynduh ia u, hynrei ula ia kynduh tang ia ki arngut ki nongialam, U  Ahmed Patel bad U KC Venugopal bad la iathuh ba ula kren shai ia kitei ki arngut, ba ka rai jongu, ka shai bha ba un hiar shuki noh ialade.

Na ka liang ka kmie jongu, ka Sonia Gandhi bad ka para jongu, ka Priyanka Gandhi, ki la pyrshang ban pyn kylla ia ka rai jongu, hynrei la sngewthuh ba um shym la kohnguh satia, ong ka khubor.

Ha ka jingialang, ha ka Sngi Saitjain ba ladep, U Rahul, ula ther tyngeh ia ki katto katne ki nongialam Congress, kiba pynmih kandidet da ki khun lajong.Wat la um shym la jer kyrteng iano iano, hynrei katei ka thew ia U  Ahok Gehlot, uba pyniakhun ia U Vaibhav Gehlot, nangta U Nakul Nath, uba dei u khun jong U Kamal Nath na Madhya Pradesh bad sa shibun kiwei pat.

Kane ka elekshon, ka dei kaba dum tam na ka bynta U Rahul Gandhi, ha kaba ula  shah rem, na ka ktem bah jong ka seng Congress na Amethi, ha Uttar Pradesh.