Pynsted ka elekshon myntri Nongkhlaw

Shillong,21iaiong:
Ka KHADC ka la hukum ia ka Hima Mylliem ba ka dei ban pyntyllun noh wut wut ia ki kam kiba dei bad ka elekshon Myntri Nong-khlaw bad ka dei ruh ban pynsted noh ia ki jingdonkam baroh ban pyndep kloi ia katei ka kam, ong u bah Latiplang Kharkongor EM ka tnad Elaka haba ia kren bad ki nongthohkhubor mynta ka sngi ha ka por ba ki nongialam ka Dorbar Kur Nongkhlaw ki la leit ban ia kynduh ia u na bynta katei ka kam.
U la iathuh ba la pynsangeh teng ia katei ka ka mar sngi shuwa ban pynlong elekshon naba la don ka jingujor ba ka don ka jingbym biang kaba la pyni ba la mih ar kynhun ki kur hynrei u la ong ba haba peit bniah ia ki kyndon ki aiñ jong ka Hima Mylliem ka pyni ba ka don tang kawei ka kur Nongkhlaw bad kumta u la ong ba baroh kiba dei na ka kur Nongkhlaw ki lah ban iakhun ha katei ka elekshon Myntri. Katba u President jong ka kur Nongkhlaw pat u bah Iaineh Nongkhlaw u la ong ba ka kur ka la dep pynbiang nadong shadong ia ki kyrteng ki nongthep vote ki khlieh shynrang kiba la palat 18 snem bad ki poi da ki hajar ngut bad ka shong sa tang ha ka sngi ban buh ia ka elekshon.