Pynskhem U Syiem, ka Hima Mylliem Ïa u pud jong ka Dorbar Shnong Rynjah bad ka RR Colony

Shillong: Hadien bun bun snem ka jingthrang ban pynbeit ïa ka kam ba la sah teng, kata kaba ïadei bad u pud jong ka Rehabilitation & Reserved Colony kaba don hapoh u pud u sam jong ka shnong Rynjah, mynta ka sngi 27 tarik u Jymmang 2019 u Syiem ka Hima Mylliem u Pa’iem Ainam Manik Syiem u la pynskhem ïa u pud u sam ka Dorbar Shnong Rynjah ha ka jingïadonlang u CEM bad Deputy CEM ka Khasi Hills Autonomous District Council (KHADC).

Kane ka la long hadien ba ka KHADC ka la ai jing mynjur ïa ka Dorbar Shnong Rynjah ban pynbeit ïa u pud u sam dang shen.

Ha katei ka sngi la wan iashim bynta ruh da u ki dkhot ka executive committee ka dorbar shnong Rynjah kumjuh u Rangbah shnong u Bah AD War ki nongshnong shnong, ki Myntri ka Hima Mylliem bad ki MDC ka District Council.

Haba ai jingkren kum u kongsan, u Bah Teinwell Dkhar u la ong, “Kane ka long ka sngi kaba kmen namar kum kane ka jingialang ban pynskhem ia u pud u sam kam da kham ioh sngew hynrei kiwei kiwei ki dorbar shnong, ki Elaka ruh ki dei ban wan shakhmat ban pynneh pynsah ia ki pud ki sam jong ki.”

U CEM ula ong, “Ki mih bun ki kynrum kynram ha kiba bun tylli ki jaka bad kane ka dei tang naka daw ba ym biang u pud u sam bad ka dei kawei ka issue kaba la pynktha khlieh ia ngi.”

 U la ong ruh ba na ka liang ka district council kan pyrshang ban pynkhlain ia ki dorbar shnong bad ki Elaka haba iadei bad u pud u sam.

“Khlem u pud u sam kan jynjar ban wanrah ia kata ka jingsynshar kaba bit kaba biang ha ki shnong ki thaw ki Elaka bad kiwei kiwei,” u la ong da kaba bynrap “Kano kano ka rai haba ai NOC khamtam haba iadei bad ka trading licence dei ban shim da ka rai jong ka executive committee jong ka Dorbar Shnong, ym dei shuh tang da ka rai u Rangbah Shnong marwei.”

U la kyrpad ruh ïa ka dobar shnong ba dei ban shimkhia haba iadei bad ka jingiadie ia theid jaka khamtam haba ka shnong Rynjah ka dei ka shnong ba shong khleh ki jaidbynriew bapher bapher.

Na ka liang u Dy. CEM u Bah Pyniaid Sing Syiem u la ong, “Ia kane ka jing pynskhem ia u pud u sam naka linag ka KHADC bad ka Hima Mylliem la leh kat kum ka ai riti synshar ka ri India ba la pynkup bor ia ka district council.”

U la ong ba ka district council ka shim rai ruh ban pyrkhing ia ka rukom ai trading licence bad lada khlem ioh NoC na u Rangbah shnong lyngba ka rai kyllum ka Executive Committee shnong ka council kan nym pdiang.