Pynskhem ka UDP Shella ia u bah Balajiedkupar ban mih bujli ha jaka u kpa

Shillong: Ka UDP Shella circle mynta ka sngi ka la pynskhem ia ka kyrteng u bah Balajiedkupar Synrem ban mih bujli ha jaka jong u kpa jongu, u Dr Donkupar Roy ban iakhun ia ka elekshon shiteng samoi ban sa long shen.

Ia ka kyrteng u bah Balajiedkupar ba 31 snem la pynskhem da ka jingialang ka party kaba long mynta ka sngi ha Saitsohpen, Sohra.

Nalor ki nongialam ka UDP Shella circle, ba la don lang u bah Balajiedkupar, la sakhi ruh ki nongialam ka UDP na Shillong kynthup u Vice president u bah Allantry Dkhar. La don lang u bah Teinwel Dkhar, u CEM, u bah TW Chyne, MDC.

U bah Balajiedkupar u dei u khun jong u Dr Donkupar Roy uba la khlad noh dang shen. U Bah Balajiedkupar u la pyndep ia ka MA, LLB.

Haba kren ha kane ka sngi, u bah Balajiedkupar u la ong ba i pa jong u, u la trei 31 snem na ka bynta ka konstitwensi bad un mih bujli ban pyndep ia ki kam ba la ialam u kpa.

U la khot ia ki paidbah ban ai ka jingiatreilang ban kyrshan ia u khnang ban poi sha ka thong ka jingjop ba un lah ban pyndep ia ki kam ba la maitphang u kpa jong u.