Shillong: Ka dorbar kur Khongsit kaba hynriew ka la long ha ka sngi ka 11 tarik Kyllayngkot 2020 ha shnong Mawmyrsiang kaba hap ha Rangshken BPO, East Khasi Hills.
Ka jingialang kur ha kane ka sngi ba la pyniaid da ka Kong Sophia Khongsit, la pynskhem ia ka jingiadei ka kur Khongsit bad ka kur Janong kum kawei bad ia kane la lap bad pynshisha lyngba ka jingwad bniah da ki rangbah ka kur Khongsit ba la phah khnang ka dorbar kur Khongsit mynshem snem.
U president ka kur Khongsit bah F. Blue Khongsit bad u President ka kur Janong bah Stanroy Janong kila ai khublei lang ha kane ka sngi kum ka dak ka jingpynshisha ia ka jingiadei kur hapdeng kine ki ar kur, ba la sakhi lang ki nongkitkam ka kur Janong, hapdeng ki dkhot ka kur Khongsit kynthei bad shynrang.
U president ka Kur Khongsit bah Blu u la ong ba da kane ka jingpynskhem ia ka jingiadei kur, kim ym bit shuh ban iashongkha hapdeng ka kur Khongsit bad ka kur Janong, hynrei kin ia burom kum shi kur shi jait. U la ong ba naduh kane ka sngi, ka Kur Khongsit bad ka kur Janong ki dei ban iatip, ban sneng ban kraw, ban hikai iaki khun ki ksiew, ki ki hymmen ki para ba kine ki ar kur ki dei kiba iateh kur katkum ki sakhi bad ka jinglap ba la naduh kulong kumah.
Shwa ban sdang ka jingialang la pynlong da ka jingduwai ba jar jar, hadien ka jingrwai pdiang na ka kur Khongsit Mawmyrsiang unit, ka kaiphod snem na u secretary bah Iatyllilang Khongsit, uba la pyntip ba ia ki kam ba bun ba leh ka Kur naduh ka jingai khusnam ia kiba pass bha ha ka jingpule, ka jingpynmih ia ka almanak 2020 bad kiwei. Ka Kur kala lah ban thaw 14 tylli ki unit ka Kur.
Phi don ban ong eiei?