Pynskhem ka Ïing bishar ïa ka Hima, ia ka bor ban ai laisen khaiï

Shillong:Ka Hima Sohra ha ka jingïakren bad ki lad pathai khubor ha Shillong press club, ka la pynbna ba katkum ka rai jong ka High Court ka jylla Meghalaya ban ai jingmynjur ïa ki bar jylla ban apply Trading Laisen ka long kum ka jingpynkubor ïa ka Hima da kane ka rai namar baroh shikatta kam don kata ka jingbthah, la ong u Bah B V Rymmai Secretary jong ka Hima ha ka sngi ba-ar.

Ha ka jingïadonlang u Syiem, Paiem Freeman Sing Syiem, u Syiem Khynnah bad ki myntri jong ka Hima, u Bah Rymmai u la ong ba katei ka jingai bor ka Ïing bishar ba donburom ka High Court jong ka jylla ka long katkum ki kyndon.
U Bah Rymmai u la ong halor katei ka rai jong ka High Court kaba la pynmih ha ka 16/12/2021, ka Hima ka la buh ruh ïa ki kyndon, bad ki kyndon ki long ba u ne kaba apply ban ïoh ïa ka jingmynjur jong ka Hima na ka bynta ka Trading Laisen, u ne ka dei ban don ïa ka dur thep vote.

Kiwei ki kyndon ki long ba ki dei ban suhlang ïa ki kot ba ki dei ki nongshong shnong, dei ban ïoh lang ïa ka jingai jingmynjur jong u Sordar shnong, ki dur, ki kot ban pynshisha ba ki dei ki nongshong shnong na ophis jong ka Deputy Commissioner, lane na ophis jong u SDO ka Sohra Civil Sub Division.

U la ong ba katei ka kam ka poi sha High Court, namar ki bar jylla ka thaiñ khappud ki la pan jingbit na u SDO, bad u SDO phah sha ka DC bad na ka DC sha Hima, kitei ki briew kim shym la wan sha ka Hima, ki la leit ban ujor sha Ïing bishar bad ka Ïing bishar ka la ai ïa ka rai ban pynskhem ïa ka bor jong ka Hima.

Ka Hima ka pynpaw ïa ka jingsngewnguh ïa ka KHADC kaba la ju pan ïa ki jingthoh na ka Hima na ka por sha ka por ban ai jingmynjur bad ka jingsngewnguh ka long kyrpang ïa ka Ïing bishar namar ka la ai bor ïa ka Hima ban shim ïa ka rai bad ka Hima ka la ïoh ïa ka lad ban buh ïa ki kyndon mano ba lah ban apply Trading Laisen.