Pynshna iing ki TULBA ia kawei ka longiing baduk, ha Umroi Nonglum

Nongpoh: Ka kynhun ki nongniah thuk thuk, kiba don ha ka shatri kaba la tip kum ka The Ultimate Legend Bikers Association (TULBA), hynnin ka sngi Saitjain ki la leit ban ai sngewbha kum ka jingai sngewbha Christmas sha kawei ka iing kaba ki la pynshna kyrpang na bynta kawei ka longiing baduk kaba don ha shnong Umroi Nongrah, Ri Bhoi District.

Katei ka longiing kaba la pyntei bad ai sngewbha da ki TULBA, ka dei ia ka iing u Bah Jewin Makri u dei naka shnong Umroi Nonglum, u rangbah uba la im jynjar ha ki snem kiba la leit noh baroh, ha kaba u la hap ban im bad shong ha ka jynjar bad sohsat, namar ba ka iing kaba pei kaba la shu syrdep tang ban lait na ka sngi u slap.

Haba leit ban ai sngewbha ia katei ka iing sha u Bah Jewin Makri, la leit ban plie da u Rev. T.P Kurbah ha ryngkat ka jingdonlang u Bah Seiborlang Lyngdoh President ka TULBA sengkmie, Samla Samuel Kurbah President ka Eastern Zone, ki dkhot ka TULBA naki tnad treikam bapher bapher, ryngkat ka jingdonlang ki bahaiing hasem jong u Bah Jewin Makri lem bad ki nongïalam shnong.
U Bah Seiborlang Lyngdoh, kum u nongialam ka TULBA, u la pynpaw ka jingsngewkmen kaba khraw ba kum ka seng ka la ioh ban pynshna da ka iing ba thymmai ia u Bah Jewin Makri, uba shem jynjar namar ka jingduk kaba la ban eh ia ka iing ka sem jong utei u rangbah, uba la mad jingeh na kaba ban palat ka jingduk.