“Pynshitom bein ia ki nonghikai LP”

Shillong 10 Naiwieng:
U President ka Khasi Jaintia Deficit School Teacher’s Association (KJDSTA) u Bah ED Nongsiang u la ong ba ka sorkar jylla ka la pynshitom bein ia ki nonghikai skul Lower Primary skul da kaba phah ialeh eksamin biang wat hadien ba ki la dep rung ha kam da ki phew snem.
“Ka KJDSTA ka sngew ba ka dei ka jingleh bym hok jong ka sorkar ia ki nonghikai bad ka dei ka jingpynshitom bein ban phah ialeh eksamin biang hadien ba ki la dep rung ha ka kam da ki phew snem tang ka bynta ban pyndep ia ka jingkwah jongka ban pynbiang ia ki kyndon ka NCTE”, la ong u Bah Nongsiang haba kren hynne sha ki nongthoh khubor.
“Kam long kaba shongnia ban phah ialeh eksamin HSSLC biang ia ki nonghikai LP ban pynbiang ia ka jingkwah ka NCTE. Ngi sngew ba ka long ka bym shongnia satia”, la ong u president ka KJDSTA.
Ka MBoSE ka la pynmih jingbna ba kito ki nonghikai kiba rung kam hadien u Nailur 2001 ki bym pat kot ia ka 45 percent ki dei ban ialeh biang ia ka eksamin ha ka HSSLC ha u snem 2015 ban pynbiang ia ki jingkwah ka NCTE.
U la ong ba ka KJDSTA ka pyrshah ia kane bad ha jaka ba ka sorkar kan phah ialeh eksamin ia ki nonghikai baroh, ka dei ban phah tang ia kito kiba la rung kam ha u snem 2013 hadien ba la ioh ia ka jingbthah na ka NCTE. U la ong ba watla ka KJDSTA kam lah ban khang lad ia ki nonghikai kiba kwah ban ialeh ia ka eksamin, hynrei ka ieng beit ha ka nongrim ban pyrshah ia kane ka jingleh ka sorkar.
“Lada ka sorkar ka leh bein ia ki nonghikai ban pynduh kam lada kim lah ban pas ia ka 45 percent, ka KJDSTA kan sa leh da ki kam”, la ong u president ka KJDSTA. U la ong ba ka sorkar pdeng kam ju pynmih ia ka jinghukum ia ka sorkar jylla ban pyndep ia ka jingkwah ka NCTE hynrei ka dei tang ka jingai jingmut bad ka shong ha ka sorkar jylla ban pdiang ne em.
“Ka NCTE ka dei tang ka met kaba ai jingmut bad ka shong ha ka sorkar ban pdiang ne em ia kane”, la ong u Bah Nongsiang. U Bah Nongsiang u la ong ka sorkar ha jaka ban phah ialeh eksamin biang, ka dei ban shu ai jinghikai ne training biang ia ki ban pyntbit shuh shuh ia ka kam nonghikai ym da kaba phah ialeh eksamin namar ba ka kam hikai ka dei ka sap. U la ong ba kane ka jingleh ka MoBOSE kan pynpyrkhat ia ki nonghikai ban kiar kaba iatreilang bad ka, nangne shakhmat lada kam sngap ia ka jingud jong ki nonghikai.
Hynrei ha kawei ka liang, na ka liang ka MoBOSE ka la ong ba ka kwah ban pynlong ia kane ka eksamin ban iarap ia ki nonghikai ban pyntbit ha ka kam hikai. Katkum ka jingong jong u Executive Chairman ka MoBOSE, u bah EP Kharbhih, ka Board ka la pynkhreh ruh ban pynjynsur ha ka jingai mark kumba 20 percent ia ki nonghikai na ki jingkylli lyngkot. Haduh mynta, ki don kumba 7819 ngut ki nonghikai LP kiba pyndap phom ban ialeh biang ia ka eksamin HSSLC.