Pynshisha ia kiba thang Vikash

Shillong,28 Risaw:
Mynta ka sngi ki pulit ki la pynshisha ba ki 2 ngut ki dkhot ka KSU kiba la shah kem na ka jingsuba ba dei kiba donkti ha kaba thang ia ka dukan u Vikash Nandwal uba la khlad noh, ki dei shisha kiba la leh ia katei ka kam. “Ki pulit ki don ki jingpynshisha kiba biang halor ka jingdonkti jong ki ha kiba bun ki kam pyntrien ha kitei ki thain” ong u SP City Bah Vivek Syiem.
Lah ban pynkynmaw ba 2 ngut ki dkhot ka KSU na Mawprem ki la shah kem hadien ka jingshah thang ka dukan jong u Vikash ha Motphran, u vikash u la khlad noh hadien ka jingmynsaw jur.
U Bah Syiem u la ong ba ka tnad pulit ka la pynjur ki bor pahara ha ki thain ka Motphran ban peit ban ym mih kino kino ki jingjia kiba la ju jia ha ki 2 bnai mynshuwa. U la ong ruh baa ban tehlakam na ki kam pyntriem ki pulit ki la khot ruh ka jingiatreilang jong ki Rangbah shnong bapher bapher.
Ka tnad pulit ka la kyntu ia ki nongdie dukan ba kin buh ia ki CCTV Camera ha ki dukan jong ki , ha kaba u la ong ruh ba hadien katei ka jingjia ha Motphran bun na ki dukan mynta ki la sdang ban buh ia ki CCTV Camera ha ki dukan jong ki. “Ka pynsuk ia ngi ban kem ia ki runar lyngba ka jingdon ka CCTV Camera” pynkut u Bah vivek Syiem SP City.
Ha kawei ka khubor, la iathuh ba mynta ka sngi ki pulit ki la kem ia u Secretary ka KSU Mawkynroh Unit, u Kyntiewborlang Marbaniang , 22 snem karta. U SP u la iathuh ba la kem ia utei u nongialam ka KSU namar ka jingdonkti jong u ha ka jingjia kaba ki nongtrei bylla ha NEHU ki la shah thombor. Ka khubor pulit ka la iathuh ba la kem ia u namar ka case ba la kynnoh ba ka dei ka jingthmu ktah kti ia kawei ka trok bad ka jingthmu pyniap ia ki nongtrei bylla ha NEHU.