Pynshai u heh pulit ka Ri Bhoi, ba shah kynnoh ba um shimkhia Ban bat ia ki trok kit Dewiong

Nongpoh: Hadien ba la mih ki jingshah kynthoh ha ki lad pathaikhubor, kaba la ong ba ki Pulit ka Ri Bhoi kim shem la shimkhia, ha ka ban bat ia ki Trok kit Dewiong kiba iaid lyngba ki surok ha Ri Bhoi, na ka liang u Heh Pulit ka Ri Bhoi, u la pynshai ba ki pulit ka Ri Bhoi, ki trei shitom bad ki la ju iai ioh kem ia shibun ki trok Kit Dewiong, kiba la kit dewiong beain bad kiba thmu ban iaid lyngba bun ki surok kyndong kiba don hapoh ka District.

Haba pynshai halor katei ka jingshah kynnoh bym leh ei ei ia ki Trok kit Dewiong beain, u Bah C. Syrti, Superintendent of Police ka Ri Bhoi, u la ong ba ki Pulit ka Ri Bhoi, ki la ioh ban bat ia kiba bun tylli ki trok kit Dewiong, ha kaba tang ha une u snem 2020, ki la ioh ban bat haduh 41 tylli ei ei ki trok kit Dewiong bad ki la don haduh 19 tylli ki case kaba ki Pulit ki la dep ban rejister.

Haba batai bniah halor ka jingioh bat ia ki trok kiba kit beain ia u Dewiong, u SP ka Ri Bhoi u la ong, ba ia kitei ki Trok la ioh ban bat na kiba bun tylli ki jaka, kata ha ki thain Umroi, ki thain Mawlyndep, ki thain 4 Nombor lem bad ha kiwei de ki jaka bad u la ong ruh ba bun na kitei ki trok kit Dewiong kiba la ioh ban bat, ki dei kiba la pyndonkam da ki surok kyndong, kiba la iaid khnang na kitei ki surok, da ka jingthmu ban lait phet na ki Pulit.
Shuh shuh, utei u heh Pulit ka Ri Bhoi, u la ong ruh ba watla ki Pulit ki la trei shitom miet bad sngi na ka bynta ban bat ia kito ki trok kit Dewiong beain, hynrei ym tip pat ioh lehse ki don ki katto katne tylli ki Trok kit Dewiong, kiba ioh ban laitphet tuh ha Ri Bhoi, namar ka dei ka surok kaba bun bha ki kali kiba iaid ba ieng.Namarkata, u la ong ruh ba ka nongrim kaba la pynlong ia ki Pulit ka Ri Bhoi, ba kin ngat ha katei ka apot shah kynnoh ba kim leh ei ei, lehse ka dei ba ki Pulit kim ju pyntip paidbah lyngba ki lad pathaikhubor, haba iadei bad ka jingiohkem trok kit Dewiong da ki Pulit.