Shillong: U myntri rangbah ka jylla u Conrad K Sangma myn hynnin ka sngi ula khot ia ki sengbhalang ha ingsah jongu ban pynshai ia ka rai ka sorkar ban khot dorbar kyrpang na ka bynta ban shim da ka rai ban pyntreikam da ka Bengal Eastern Frontier Regulation Act 1873 ne ka Inner Line Permit (ILP) ha ka jylla Meghalaya.
Ka dorbar kyrpang ka ing dorbar ka jylla kan long ha ka 19 tarik Nohprah 2019 ban shim da ka rai ban pyntreikam ia ka ILP ha ka jylla.
Kane ka jingkhot u Conrad ia ki sengbhalang ka long hadien ba la u la wan phai na jingiakynduh ia u myntri kam pohiing ka ri u Amit Shah na nongbah Delhi.
Haba pyntip ia kane, u chairman ka Confederation of Meghalaya Social Organisation (COMSO) u bah Robertjune Kharjahrin ula iathuh ba kane ka jingiakynduh ia u myntri rangbah ka jylla ka long tang ban ioh ia ka jingshai kaba bniah ha kaba ia dei bad kata ka jingkhot ia ka dorbar ba kyrpang.
Ha kane ka jingiakynduh nalor jong u myntri rangbah ka jylla la don lang u president jong ka party UDP, u Bah Metbah Lyngdoh, u bah Lahkmen Rymbui bad u bah Brolding Nongsiej.
U bah Robertjune ula iathuh ba ha kane ka jingiakynduh, u myntri rangbah u la kren shai ha khmat jong ka COMSO ba ka jingkhot ia kane ka dorbar ba kyrpang kan long ban shim ia ka rai ban pyntrei kam ia ka ILP ha ka jylla.
U Chairman ka COMSO, u la ong ba ha kine ki sngi kin dang leit ia kynduh ia ki nongialam seng sain pyrthei jong ka Congress, ka BJP bad kum juh ia ka kynhun United Progressive front (UPF) ban pan ia ka jingkyrshan na kine ki kynhun ruh ba ki dei ban ai ka jingkyrshan ia ka sorkar ha kaba ia dei bad ka rai ban pyntreikam ia ka ILP ha ka dorbar kyrpang kaban long ha ka 19 tarik Nohprah 2019.
La sngewthuh ba katei ka dorbar, ka wan hadien ka jing ia pynbeit jong u myntri rangbah ka Jylla, U Conrad K Sangma bad u lamphang dorbar, U bah Metbah Lyngdoh, ha ryngkat ba kiwei pat ki myntri jong kane ka sorkar synrop Meghalaya Democratic Alliance (MDA).
Ki lad khubor ki iathuh ba ka jing pynkhreh, ka la biang lut, na bynta ban pynlong ia katei ka dorbar kaba shisngi, kaba dei halor ka rai ban pyntrei kam da ka ain Inner Line Permit (ILP) ha ka Jylla bad kaba sah, ka long, sa tang ban ioh ia ka jing mynjur na U Lat ka Jylla, ba un soi bad pynthikna ia katei ka tarik shong dorbar.
Halor katei ka rai jong ka dorbar Jylla, ban khot ia ka dorbar kyrpang, ha ka 19tarik, la iathuh paidbah, da U bah Allan F Dkhar, uba dei ruh u nongialam ba rangbah jong ka seng UDP, ha ka jingialang paidbah jong ka CoMSO, mynta ka sngi ha Mawlai Petrol Pump.
Kawei pat ka khubor ka iathuh ba u myntri kam pohing ka sorkar India u Amit Shah ha ka por ba u ai jing kren ha ka jylla Jharkhand u la kular ban iada ia ki hok jong ki paid ka jylla Meghalaya bad thain mih ngi baroh kawei. Hadien ba mih ki jing klumar bad jing iakhih khamatm ha nong bah Shillong myntri rangbah ka jylla Meghalay u Conrad K Sangma lem bad ki delegates na ka jylla Meghalaya ki la leit ban ia kynduh ia u Amit Shah ban dawa ban pyllait ia ka jylla Meghalaya bad thain lam mih ngin a ka CAB 2019.
U myntri kam pohing ka sorkar India u Amit Shah u lah kular ban ia kynduh biang bad u Conrad K Sangma hadien ka khristmas halor ki mat jing dawa ka sorkar Meghalaya bad thain lam mih ngi hi baroh kawei.
Na ka liang ka Central Puja Committee (CPC) jong ka jylla Meghalaya ha ka jing ialang mynta ka sngi 15 tarik nohprah ka lah rai ban ai jing kyrshan ia ki nong pyrshah ne iakhih pyrshah ia ka Citizenship Amendment Bill 2019 (CAB) ha ka jylla Meghalaya.
Ka seng ka lah iawer ban kyntu ia baroh ki bar jylla ki ba don ha ka jylla Meghalaya ba ki dei ban ia snoh kti lang bad ki jaitbynriew Khasi, Jaintia bad Garo ban pyrshah jur ia ka CAB 2019 ka ba la pynlong ain da ka sorkar kmie khem da pynsngew ia ka jing angud ka jylla Meghalaya bad thain lam mihngi baroh kawei. Ka seng ka lah pyn paw ruh ba kane ka CAB 2019 ka lah iuh roit ia ka jing ngeit ka CPC haba dei ban burom ia baroh ki jait niam.
Ka seng ka lah kyntu ia ka sorkar kmie bad sorkar Meghalaya ba ki dei ban wanrah da ki ain ba khlain ban iada bad burom ia ka piad ka jylla bad thain lam mihngi baroh kawei.
Phi don ban ong eiei?