Pynshai ki pulit ia ka HNLC

Shillong,8 Nailar:
Ka tnad pulit ka la kyntait halor ka jingkynoh kaba la mih ha ki khubor ba ka tnad kam sngewtynnad ia ka jingkhot ia kren ia suk ka sorkar bad ka seng HNLC, ka la pynshai ba ka tnad ka kyrshan ia kaei kaba ka sorkar ka shim ia ka rai.
Kumjuh ruh ka sorkar jylla ka la kyntait halor ki jingpynmih khubor kiba la ong ba ka soar pdeng ka lyngngoh halor ka jingkhot ia kren ka sorkar jylla ia ka HNLC, ka sorkar jylla ka la pynshai ba ka jingkhot ia kren ia baroh ki seng lehnoh kiba don ha ka jyla ba kin wan shakhmat na ka bynta ban ia kren ia suk ka dei ban wanrah biang ia ka ingshong suk shong shngain ka jylla baroh kawei.
Ka sorkar jylla ka la kyntu ruh ia baroh ki seng lehnoh ba kin shim ia ka kabuz ban wan shakhmat bad ban ioh ruh ia ki jingmyntoi kijba ka sorkar ka la pynkhreh ban ai na ka bynta jingiarap na ka bynta jong ki. Ka sorkar ka la sngap ruh ia ka jingkwah ia kren ia suk ka HNLC, bad mynta ka dang wad ia ki lad ki lynti ban pynurlong noh ia kitei ki jingiakren ia suk, bad ka don ka jingpynkhreh na ka bynta ban pyndep noh ia katei ka jingthmu.