Pynshai ki paidbah ka Umsaw Nongkharai ba byrngem tur KHADC

Shillong, 30 Risaw:
Ki paidbah nongshong shnong ka Umsaw Nongkharai, Ri-Bhoi ki la pynshai ba ka jingmih khubor ha u Rupang bad ha kiwei ki kot khubor Khasi kaba ong, “Byrngem tur ki paidbah sha KHADC na u Acting Rangbah Shnong ka Umsaw Nongkharai’. Ha ka jingpynshai ba la soi kumba 24 ngut eiei ki nongshong shnong, ki la ong ba ka kynhun hapoh ka jingialam jong u Bah Joseph Lyngdoh, Acting Rangbah Shnong, u shah la thung da ka KHADC ha ka 18 tarik Risaw, 2016 bad ka KHADC kam banse ban tuklar bad shim khia ia ka kam namar ki jingleh thombor jong u A Sun, uba kam jubor kum u Rangbah Shnong.
Ki la ong ba ka jingkynnoh ba donkti ki politishian ka long bym nongrimnamar ba ka KHADC ka sngewthuh bad tip ban bishar katkum ki kot ki sla, ki la ong.
Ki la pynpaw ia ka jingsngew lyngngoh ruh ba u A Sun bad ki briew jongu, ki kren khliehbiej ia kajuh shi kajuh da kaba ong ba la dep jied Rangbah Shnong ia u ha ka 10 tarik Nailur, 2016, wat ki paidbah ki la dep pynshai ha ki lad pathai khubor namar ba kam don satia kano kano ka jingjied Rangbah Shnong ia u.
“Hynrei ha ka 8 tarik Nailur, 2016, u la shu phah pynbna ba kan don ka dorbar pyllun ha ka 10 tarik, Nailur, 2016 bad ha katei ka sngi, shwa ban  wai ka dorbar, la shu ong beit rah kti kiba dang mon ia nga bad don tang katto katne ngut kiba rah kti kiba dang mon ia u bad u la shu ong nga la long Rangbah Shnong thymmai”, la kynnoh kine ki paidbah ka shnong Umsaw Nongkharai ha ka kyrwoh ba la pynlait.
Ki la kynnoh ruh ba kumno u A Sun u la kynnoh khlem nongrim ia u Bah KS Nongrum ban ong ba u la rem ha ka jingjied Rangbah Shnong haba wat ha ka dorbar ha katei ka sngi, ruh u Bah Nongrum um shym la wan. “Ka kynhun ka ai ia ka jingmaham ia u A Sun ba lada u dang pynmih biang ia ka kyrteng jong u Bah KS Nongrum khlem nongrim, ka kynhun kan leh da kaba tyngeh ia u”, kila maham.
Kine ki nongshong shnong ki la kynnoh ruh ba u A Sun u la leh donbor ha ka por ba u dang long rangbah shnong la ar term bad u la thung ia ka lok lajong ka Therisia Timung kum ka nongsam pisa MGNREGS katba ia u pyrsa kurim jongu u Goerge Dominic Timung la thung kum u secretary ka VEC Umsawnongkharai, kiba dei shi iing shi sem, ka bym don koit ha kiwei ki jaka kum ha kane ka shnong.
“U Bah Josepth Lyngdoh u Acting Rangbah Shnong bad ka kynhun jongu, ka ieng skhem beit halor ka hukum ba la pynmih da ka KHADC ha ka 18 tarik, Risaw, 2016 na ka bynta ka jingshisha bad ka hok jong u paidbah nongshong shnong Umsawkharai”,ki la pynkut ka kyrwoh.