Shillong: Mynta ka step ki paidbah ka jylla ki la shong syier hadien ba la mih ki khubor lyngba ki ‘social media’ ba la don uwei u ba la ioh jing pang ‘Corona virus’ hapoh ka hospital North Eastern Indira Gandhi Regional Institute of Health and Medical Science (NEIGRIHMS).
Ka Dr. M Marbaniang ka ophisar jong ka ‘State Surveillance’ ha ka jing ia don lang ryngkat bad u myntri ka koit ka khiah u A. L Hek lem bad kiwei ki ophisar bad doktor na NEIGRIHMS ka la pynshai ba kam pat don satia ka jing pang ‘Corona virus’ hapoh ka jylla.
“Hoid lah don ba shah ‘admit’ hapoh ka hospital NEIGRIHMS, hynrei kam dei ba u don pang Corona virus, hynrei dei ba u don jing shit bad jyrhoh malum mala” ka la bynrap.
Ka Dr. M Marbaniang ka la ong ba ka jing shah ‘admit’ jong uwei hapoh NEIGRIHMS kadei namar une u briew u ju wan shang kylleng sawdong ka ri India khamtam ha nongbah Delhi bad kadei ka kamram jong ka hospital ban peit bniah da ka ba peit thuh ‘screen’ bha ia u. Ka Dr. M Marbaniang ka la iathuh ruh ba ki doctor ka NEIGRIHMS ki dang phah ia ka ‘sample’ sha Kolkata na ka bynta ban tip kham bniah shuh shuh halor ka jing pang jong uwei ba thiah ha NEIGRIHMS bad kane kan shim por kumba 2 sngi.
Na ka liang ki doktor ka NEIGRIHMS ki la kyntu ia ki paidbah ba kim dei ban sheptieng namar kane ka jing thiah jong uwei hapoh NEIGRIHMS kadei tang na ka bynta ban lap bniah halor ka jing pang ‘Corona virus’.
Ka Dr. M Marbaniang ka la iathuh ruh ba ki la don 63 ngut ki briew na bar ri India ki ba la dep peit thuh bha (Screen) hapoh ka jylla Meghalaya.
U Dr. Aman War u la ong ba kum ha kane ka por ba kylla ka mariang kin don beit ki ba ioh jing pang shit lade jyrhoh, hynrei kim dei pat ban tieng ioh ba dei ‘Corona Virus’ bad ki dei ban wan sha hospital na ka bynta ban ioh jing sumar bad jing pyn shisha.
Phi don ban ong eiei?