Pynshai ka MCPC, ba kam kyrshan ia u James Sylliang

Shillong, 17 Risaw:
Ka Mawhati Constituency Political Committee (MCPC), hapoh ka jingialam jong u bah Julius Dorphang mynta ka sngi ka la pynshai ba kam kyrshan satia ia u James Sylliang uba thmu ban ialeh MDC na Mawhati.
“Khnang ba ki paidbah kin nym kulmar jingmut ngi kwah ban pynshai sha ki paidbah ba ka MCPC, kam pat shim rai ban kyrshan iano iano bad ka jingmih khubor ba kyrshan ka MCPC ia u James Sylliang ka long kaba bakla” la ong u bah Julius.
La iathuh ba ka jingpynmih khubor ba kyrshan ka MCPC ia u James Sylliang ka dei lyngba u bah M Thongni u bym dei satia u dkhot jong ka MCPC bad haba la pan jingshai na u bah Thongni u la panmap halor katei ka jingpynmih khubor la iathuh shuh shuh ki nongialam ka MCPC.
Haba kren ha ki nongthoh khubor ha Shillong Press Club mynta ka sngi, ki dkhot jong kane ka Committee ki la iathuh ba haduh mynta kim pat shim ia ka rai iano ban kyrshan ha kane ka ilekshon ban wan bad ki la kren kob ruh ba lada kane ka committee ka kyrshan ia uno uno u kyrtong un jop beit da kaba suk ha kane ka ilekshon MDC ban wan.
Na ka liang jong u bah Julius Dorphang shimet u la iathuh ba haduh mynta um pat buh jingmut iano ban kyrshan bad u la ong ruh ba um pat lah ban ong la un ialeh ne un nym ialeh ia kane ka ileskhon MDC ban wan, hynrei katkum ka jingsngew shimet jongu, u la ong ba un nym ialeh satia.
Haba kylli pat la u Bah Julius un rung ne em sha ka party Congress haba mynta u iatreilang bad ka sorkar ba la lamkmat da ka Congress, u Bah Julius Dorphang u la ong, ngam pat shim rai, ngan da peit shuwa.