Pynshai ka Kong Wansuk ia ka skhim U Modi ha Mawlyngot

Shillong, 6 Rymphang:
Ka MP ka Rajya Sabha ka Kong Wansuk Syiem hynne ka sngi ka la ai jingpynshai sha ki paidbah halor ka skhim Sansad Adarsh Gram Yojana.
Ia kane ka jingalap paidbah la pynlong ha madan Iewrynghep kaba hap hapoh ka Mawkynrew Community and Rural Development Block East Khasi Hills.
Ki shnong ki ba shah jied ban ioh bynta ia kane ka skhim Sansad Adarsh Gram Yojana ki khynthup ka shnong Iewrynghep, Umkhoi bad ka shnong Mawlngot.
Haba kren ha kane ka jingialang ka kong Wansuk Syiem ka la ong ba kane ka skhim Sansad Adarsh Gram Yojana (SAGY) kadei ka skhim na bynta ban kyntiew ia ki jaka kiba hap hapoh Nongkyndong kynthup ia ki jingshna ia ki surok ban kyntiew ia ka iaka pule puthi bad ban kyntiew ia kakoshor.
Ka kong Syiem ka la kyntu ia ki paidbah kane ka shnong ba kin iatreilang bad ka sorkar na ka bynta ban pyntreikam ia kane ka skhim ha kine ki shnong ba kan long kaba jop.
Ka kong PL Lawai ka Project Director ka District Rural Development Agency ka la pyntip ba ia kane ka skhim Sansad Adarsh Gram Yojana (SAGY) la pyllait da u Myntri Rangbahduh ka Ri u Narendra Modi ha u bnai Risaw 2014 na ka bynta ban kyntiew ia ki jaka ha nongkyndong.
Kine ki lai tylli ki shnong kiba shah jied ban pyntreikam ia kane ka skhim ki don 207 tylli ki ing bad 1016 ngut ki briew.
Ha kane ka jingialang la don lang da u nongmihkhmat ka thain u bah R Pyngrope, u BDO ka Mawkynrew u bah WB Marbaniang, ki Rangbah shnong bad ki padibah ka shnong.