Pynshai ka Dorbar Shnong, halor ka jingkhang dam ha Shella

Shillong: Ha ka kyrwoh ba la phah da u Bah Roy Kupar Synrem, Secretary jong ka Dorbar Shnong Shella la iathuh ba hadien ka jingmih khubor ” Yn khang dam ka Dorbar Shnong Shella ha ka sngi dap snem u (L) Dr Don Kupar” ha ka 28 tarik mynta u bnai ka Dorbar Shnong Shella, ka pynpaw ba kane ka khubor ka lah ban ialam bakla ia ka jingsngew ki paidbah bad ki ba ha ing ha sem utei u Rangbah bad ka lah don ruh ka jingsngewthuh bakla ia ka jingthmu jong ka dorbar shnong.

Kumta ka dorbar ka kwah ban pynshai ba jingkhot jong ka Dorbar ia ka jingkhang dam ha katei ka sngi ka dei halor ka nongrim ba ka 28 tarik ka ia tyngkhuh ruh bad ka sngi iew Shella. Kumta ban pynduna ka jingiabun briew ha Iew Shella bad kum ka jingburom ia kane ka sngi na ka liang ka shnong, ka shim ia kane ka rai ban phah khang ia ki dukan bad ki ophis kiba don hapoh Sohlap, kaba dei ka jaka pynlong iew, bad kumjuh ruh ban pynsangeh ia ki kali ban iaid ha katei ka sngi, ka 28.07.20.

Na ka liang ka shnong ka pynpaw ba kam don kano kano ka jingkhang ia ki ba ha iing ha sem ne kino kino ki briew ba iajan bad utei u Rangbah ba kin ia mih na ki kher kiba don hapoh shnong ban leit leh burom ia u ha u lum jingtep ha Jatap.