Nongstoiñ: Kum shi bynta ban ai jingpynshai ia ka Clan Bill 2018 jong ka KHADC, na ka liang jong ka Synjuk Ki rangbah Kur ka Bri u Hynniewtrep myn hynnin ka sngi, ki la ioh ban pynlong ia ka jingialang hapoh Hall jong ka MECOFED, Nongstoiñ ha kaba la wan ban iashim bynta lang ruh da ki rangbah kur na ki kur bapher bapher jong ka West Khasi Hills District.
Katei ka jingialang ka long ruh kum shi bynta ban iatai halor kumno ban ïeng iada ia ka hok jong ka kur ka jait bad ruh ban nang pynkhlaiñ shuh shuh ia ka rukom synshar kur da kaba yn ithuh noh da ka aiñ bad ha katei ka jingialang la iadon ryngkat lang ruh u President ba rangbah jong ka Synjuk Ki rangbah Kur ka Bri u Hynniewtrep u Bah Herman Nongrum, u Genereal Secretary ka Synjuk Ki Rangbah Kur jong ka Bri u Hynniewtrep u Bah Aristotle Lyngdoh bad kiwei kiwei.
Na ka liang jong u bah Aristotle Lyngdoh Genereal Secretary ka Synjuk Ki Rangbah Kur jong ka Bri u Hynniewtrep, u la ai jingpynshai ha kaba iadei bad ka Clan Bill ba la pass da ka KHADC ha u snem 2018 bad kaba khlem pat ioh ia ka jingmynjur na u lat ka Jylla bad u la kren ruh ha kaba iadei bad ka rukom ai jait kata ban ai jait sha ka kmie da kaba u la ong ba ka jingai jait kmie ka long ka kyntang bad kaba donkam bha ban tyngkai.
Shuh shuh u bah Lyngdoh u la pynpaw ruh da kaba ong ba ka Clan Bill ka long kaba donkam ban pyntreikam noh namar khnang ba kane ka bill kan iarap ban nang pynkhlaiñ ia ki Seng kur bad ban ithuh ruh ia ki da ka ain nangta u la ong ba ka Clan bill kadon ia ka tribunal ban bishar ia u ba dei hok bad u bym dei hok na ka jait ka kur.
Ym tang kata u la iathuh ruh ba ka ILP ka long tang kum ka kynroh ban iada, katba ka Clan Bill pat kadei kata kaba pyniap ia kita ki khniang jingpang ha kaba ym lah ban shu ialeh tad dor ia ka kur ka jait.
Kiwei pat kiba la ai jingkren ha katei ka sngi ki kynthup ia u bah R.L Kharpran, Vice President ka Synjuk, Bah M.Nongrem District President SKRK South West Khasi Hills, bah Manhun Thabah, Bah Macmillan Kharbani, Bah P.W Myrthong bad kiwei kiwei.
Ha katei ka sngi katei ka Synjuk kala ioh ruh ban thaw noh ia ka tnad hapoh West Khasi Hills District ia kaba la tip ruh kum ka ka Synjuk Ki Rangbah Kur jong ka West Khasi Hills bad la ioh ruh ban jied bad pynskhem ia ki nongkitkam kiba kynthup ruh ia u bah u bah Boldness Nongum kum u President, Bah T. Lyngdoh Lyngkhoi bad Bah Manhun Thabah ki la shah jied kum ki Vice President bad ia ka kam General Secretary la ioh da u bah Macmillan Kharbani, Joint Secretay Bah R.S Khardewsaw bad Bah P.W Myrthong, Tresurer Bah Blassing Marngar bad kiwei kiwei ryngkat ki dkhot ka Executive Committee bad ki dkhot jong ka Synjuk bad la thung ruh ia ki arngut ki Nongai jingbuit (Adviser) ba kynthup ia u Bah Witting Mawsor MLA barim bad Bah Srally Rashir u ba long u Sordar ka Shnong New Nongstoiñ.
Ia kitei ki dkhot bad nongkitkam ba thymmai jong ka Synjuk ha West Khasi Hills la ioh ban pynskhem da u President ba rangbah jong ka Synjuk u bah Herman Nongrum bad na ka liang jong u President Rangbah haba ai jingkren hadien balal dep ban pynskhem u la ong ba ka jingma kaba khraw kaba ap ia ki kur ki jait mynta kadei na ka shongkha khleh, na ka shongkha khynnah bad kumjuh ruh na ki jingsniew kiba mih na u Drug.
Ka synjuk ka la shim ruh ia ka rai ha katei ka sngi ban kyntu ia ki para kur baroh kiba don ha West Khasi Hills, ba kin don noh la ki jong ki Seng kur ban, nangta ban ithuh noh ia ki kur da ka ain bad ka committte ka kwah ruh ba ka clan Bill 2018 jong ka KHADC kan long aiñ noh.
Phi don ban ong eiei?