Pynsangeh shwa ia ka phiah Constituency KHADC: Process

Shillong, 7 Nailar:
U MLA barim ka Mawlai Bah Process T.Sawkmie u la ong ba u Lat ka Jylla u dei ban pynsangeh shuwa ban ai jing mynjur ia ka Bill phiah Constituency jong ka Khasi Hills Autonomous District Council (KHADC).
U Bah Process u la pyrshah jur ia kane ka jingphiah Constituency ba thymmai bad ong ba lada ka treikam, ka shnong Mawpat bad ka Mali (Block I, II, III) kin sa lait noh na Mawlai bad kan sa pynkulmar ia u paidbah ha kiba bun ki liang.
U Bah Proces u la ong ba ka jingphiah constituency kam pat donkam bad ka Executive Committee ka KHUDA, kam dei ban bam ja khluit. U la ong ba la mih bun ki jingpyrshah na kiba bun ki liang halor kane ka Bill bad u Lat u dei ban pynsangeh shuwa ia ka bad ban ailad ba ki Constituency kin neh kumjuh ha kane ka elekshon MDC ban wan.
“Ki District Council haba ki mut phiah thymmai ia ki Constituency, ki dei ban da leh tiak pa tiak bad da iasyllok ia ki shnong ki thaw bad u paidbah u ban sa shah ktah”, la ong bah Process.
U Bah Process ula ong u Myntri ka DCA u dei ruh u MDC ba la slem bha hapoh ka iing KHADC bad u tip bha ia ki Rule bad Regulation jong ka Council bad ka jingkren jongu ban pynkhreh thymmai ia ki constituency ka long kaba dei.
U Bah Process u la ong ba ka jingphiah Constituency kam dei ka kam kaba kyrkieh. Kaba Donkam eh mynta ka long kumno ban nang pynkhlaiñ ia ka Sixth Schedule bad ia ki bor jong ka District Council la ka dei ha ka jingiadei kam bad ki kam mynder, ki jaka puta, u pud u sam bad ban iada ia ki riti dustur bad ka jinglong ba kyrpang jong ki Jaidbynriew Khasi.