Pynsangeh shipor, ka High Court, ban leit pynbeit pud sha khappud Assam Meghalaya

Shillong: Ka Meghalaya High Court, ha ka hukum ba shipor, kaba mynta ka sngi, ka la bthah, ba ka jingleit pynbeit pud ha madan, kam dei satia ban treikam ha kine ki sngi, ban sa wan, hapdeng ka Assam bad ka Meghalaya.

Katei ka hukum jong ka kashari, ka dei hadien ba ki saw ngut ki khlieh nongsynshar, ki la ujor sha ka kashari, halor kane ka jing pynbeit pud hapdeng ka Assam bad ka Meghalaya. Kitei ki khlieh nongsynshar, ki kynthup ia U bah R Hamberley Wahlang, Syiem ka Hima Jirang, U Bah Ainam Manik, Acting Syiem ka Hima Mylliem, U Bah Pholasly Nianglang, Sirdar ka Nonglang Sirdarship bad U bah Erald Jyrwa, Acting Syiem ka Hima Nongspung.

Lyngba katei ka hukum, ka la pynkut noh shipor, ia ka soskular pynbeit pud, hapdeng ka Assam bad ka Meghalaya, kaba la ladep ia mynjur hapdeng ki ar jylla, na bynta ka kylla kaba nyngkong bad kaba la ia soi hapdeng U Conrad Sangma, myntri rangbah ka jylla, U Himanta Biswa Sarma myntri rangbah ka Assam bad nangta U Amit Shah, myntri kam poh iing ka sorkar India, ha ka 29tarik Lber 2022.