Shillong: Hadien ka jingshah khot hajir myn hynnin ka sngi, ha u Executive Member (EM) ka KHADC u bah Latiplang Kharkongngor, ki briew jong ka tnad AMD ki la ong ba ka AMD kam dei satia ka tnad ka ban tih Uranium, hynrei ka dei ka tnad kaba leh ia ki jingwad bniah Research bad ka don ka jingiapher bak ly bak na ka UCIL.
Ki saiantis ka AMD haba kren sha ki nongthohkhubor:Rupang
U Sandeep Hamilton Regional Director bad u Dr.Rahul Bannerjee Dy.Regional Director, haba kren sha ki nongthohkhubor ki la ong ka AMD kam dei satia ka tnad kaba don bynta ha ka kam tih Uranium bad ki paidbah ki sngewthuh bakla da ka jingmut ba ka dei ka UCIL. Ki la ong ba ka jingleit jong ki sha Mawthabah ka dei ka kam kaba kum ki saiantis ki hap ban leh ban wad bniah ia ka jingdon ki mar pohkhyndew da kaba ksam kumba 20 ne 30 mitar shapoh ban lap don aiu.
“Ngim wad Uranium, hynrei ngi wad don aiu hangto, u lah ban dei u Uranium ruh ne da kiwei pat ki mar pohkhyndew” ong u Rahul haba kren sha ki nongthohkhubor. “Ka don ka jingsngewthuh bakla ha ki briew ba ki nangmut ba ngi dei na ka UCIL ki sa mih ki jingpynkulmar, ka AMD ka dei la ka jong ka tnad jong ka sorkar kaba wad bniah ia ka jingdon ki mar pohkhyndew katba ka UCIL pat ka dei ka ba tih Uranium” ong biang u Rahul.
Shuh shuh u la ong ba haba ka kynhun jong ka AMD ka hiar sha Mawthabah ka dei lyngba ka hukum kaba mih na Headquarter na Mumbai, “Ngi dei ki saiantis , ngim dei ki nongtih Uranium, ka jaka ba ngi leh Research ka jngai haduh 10 kilomitar na ka jaka tih Uranium” u la ong. Haba kylli nangno ki ioh jingbit , u la ong ba katkum ka Atomic Energy Act 1962 ym donkam satia ban pan jingbit nangno nangno hynrei donkam ban ioh jingbit tang ia ki trai jaka.
Haba kylli la ki la pyntip ne-em sha ka sorkar ne District Council u la ong “Kam dei ka kam jong ngi ban leit pyntip ia ka sorkar ne ki bor District naba ia ka kam pyntip la leh beit na ka kyrdan jong ki IAS ophisar bad haba ki phah briew sha kano kano ka jylla, la pyntip na Mumbai sha baroh ki Chief Secretary jong ki jylla bapher bapher bad ka dei ka kamram jong ki CS ban pyntip sha ka sorkar, ngim wan hangne ban leit rung leit pyntip sha manla ki ophis lane ban ia kren ia thuh khana bad uwei pa uwei u briew, ngi dei ki saiantis ngi wan ban trei ia ka kam, kita ki jingpyntip ka dei ka kamram jong ka sorkar pdeng” ong biang u Rahul.
U Rahul u la iathuh ba hadien ba la mih ka jingsha pynjulor ha Mawthabah katei ka tnad ka la shim ia ka rai ban sangeh lut ia ki kam jong ka ha baroh kawei ka jylla Meghalaya, “Ngin sangeh lut baroh ki kam kiba ngi dei ban leh ha Meghalaya, ym tang ha Mawthabah hynrei ha baroh kawei ka jylla, ngi la rai ia kane tad haduh ban da mih da kawei pat ka jingiapynbeit” u la ong.