Pynsangeh ki shipai Bangla, ia ka jurip ker sainar ka NBCC ha Tamabil

Jowai, 27 Nailur:
Mynta ka sngi katba ki briew jong ka NBCC ki dang jurip ia ka jingker sainar shiah ha Tamabil, Dawki, ka kynhun ki shipai Border Guard jong ka Bangladesh ki la wan ban pynsangeh ia ki bad na ka liang ki BSF ruh ki la hap ban wan ban tuklar halor kane ka jingleh ki shipai Bangladesh.
“Hooid, ki shipai BSF ki la pynsangeh shipor ia ki briew ka NBCC, hynrei hadien katto katne kynta ngi la pynlong ia ka border meeting hadpeng ki shipai BGD bad BSF, ngi la ia poi sha ka jingiasngewthuh jingmut”, la ong uwei na ki heh BSF.
Utei u heh ki BSF u la ong ba ha ka jingshisha kadei ka jingbym shym la ioh jingtip ki BGD na ki heh jong ki na head-quarter.
“Ngi la dep ban pyntip ia ki heh jong ki naduh kine ki sngi ba la dep, hynrei kitei ki heh jong ki pat kim shym la pyntip ia kito kiba dei ban peit ha khappud”, la ong ka tyllong khubor na ki BSF.
Shuh shuh la iathuh ba hadien ka jingialang, na ka liang ki shipai BGD ki la pan map bad ki la long ruh kiba la kloi ban iatreilang ban pynurlong ia ka jingker sainar shiah ka India ha khappud.