Pynsangeh ka HYC ba thew jaka ia u bar jylla

Shillong, 18 Jymmang:
Ka HYC Baridua ka Ri-Bhoi mynta ka sngi ka la pynsangeh ia ka jingthew jaka jong u Syiem Raid Marwet na ka bynta uwei u bar jylla, ia ka jaka kaba dei jong ka Kong Ailad Lating.
Ka HYC Baridua hapoh ka jingialam u Bah John Nongrum ka la kynnoh ba u bar jylla ba kyrteng u Prem Prakash Varma u la thmu ban knieh ei ia ka jaka jong ka Kong Ailad da kaba thaw ia ki kot ki sla khyndew bym shisha.
Ka HYC Baridua ka la leh ia kane ka kam hadien ba la ioh ia ka shithi jingujor bad pan jingkyrshan na ka kong Ailad Lating halor ka jingthmu jong utei u bar jylla ban knieh iaka jaka jong ka khun jongka, ka Salami Lating.
Ki dkhot ka HYC Baridua hapoh ka jingialam u President u bah John Nongrum ki lah leit ban pynsangeh ia ka jingthmu thew jaka u Syiem ka Raid Marwet bad ka la lap ba utei u mynder um shym la don satia ia ki kot ki sla ki ba lah ban pynshai ba ka dei ka jaka jong u. U Bah John Nongrum u la ongg,”lyngngoh ba kumno u Syiem u nud ban phah jingtip sa kito ki trai jaka da kaba shim khia ia ka jingujor jong utei u mynder bym don kot don sla pyrshah ia ki Khasi”.
U la ong ba ka seng ka la maham ia u Syiem bad ia u Prem Prakash Varma lada u wan pynwit biang ia kitei ki Khasi kiba dei hok ki trai ia katei jaka, kin ai da ka jingsneng ba tyngeh pyrshah ia ki.
Na ka liang u Rangbah shnong u Bah Ioanis Narleng u la pynshisha lyngba ki kot ki sla kiba biang ba ka dei ka jaka jong ka kong Ailad Lating.