Pynsangeh ka Hima Mylliem ia ka jingtei u Rapsang ha Khanapara

Shillong, 25 Jymmang:
U Acting Syiem ka Hima Mylliem u Pa’iem Ricky Nelson Syiem u la pynsangeh noh ia ka jingtei jong u bah Mohendro Rapsang kaba don ha Iew Masi ha Khanapara.Katkum ka jingtip ba u Rupang u la ioh lum na ki tyllong khubor la ong ba ha ka 19 tarik u iaiong mynta u snem u Pa’iem Ricky, u la phah da ka jingthoh sha u bah Mohendro Rapsang myntri barim ka Hima Mylliem ba u dei ban sangeh noh ia katei ka jingtei kaba long kum ka kynja ophis ne Bank bad la ong ba u dei ban sangeh noh marsien ioh pdiang ia katei ka jingthoh.
KI tyllong khubor ki la iathuh ba ha katei ka jingthoh u Pa’iem Ricky u la pynkynmaw sha u bah Rapsang ba ka jingbit, kaba u la ioh na ka Hima Mylliem ha u snem 2010 ka dei beit na bynta ka shisnem kata lyngba ka shithi No.MS/PT/VI-1 22/2004-2010/4345-47 kaba la ai ha ka 19 tarik u lber, 2010. Ka Hima Mylliem ka la ong ba ka por jong ka la kut hynrei bah Rapsang u dang sdang pyntrei ia katei ka kam. Shuh shuh ki lad khubor ki la iathuh ba wat hadien ba ka Hima Mylliem ka la pynsangeh ia katei ka jingtrei pynban u bah Rapsang u dang bteng shaid shaid ban pyntrei ia ka kam shakhmat bad ki nongtrei ki dang don ha katei ka jaka ban trei ia ka kam.