Pynsahnam ka Shillong Muslim Union da ka Library ia U Dr. Kalam

Shillong, 15 Naitung:
U myntri rangbah ka jylla u Dr.Mukul Sangma u la plie paidbah mynta ka sngi ia ka Dr APJ Abdul Kalam Islamic Library and Information Centre kaba don ha Laban. Ha katei ka jingialang u Dr.Mukul u la ai jingiaroh ia ka Shillong Muslim Union kaba la wanrah ia katei ka shlem lum jingtip ia ki jingtip bapher bapher ha ka dur jong ka jingthoh, u la ong ba katei ka jaka kan dei ka jingkyrkhu ia ki nonglum jingtip bad ka dei ruh ka dak jong ka jingburom ia u President barim ka ri u Dr.APJ Abdul Kalam.
U Dr.Mukul u la ong ba bun ki jingtip kiba ki nongwad jingtip kim shym la ioh lum namar ka jingbym don ka jingpyntip kaba la thoh ha ka dur jong ka jingthoh. U la ong ba katei ka shlem ai jingtip na Laban kan ai buit ia ki nongthoh bad ki nongpule ba kin ioh bsuhlang ia ka jingmut jingpyrkhat ba ki ioh lum lyngba ki jingthoh kiba pher bapher. Ha katei ka sngi la donlang u Praveen Davar, u dkhot ka National Commission for Minorities, ka sorkar India uba long ruh kum u symbud kongsan bad u la noh synniang katto katne tylli ki kot sha katei ka Library.
Kiwei pat kiba la donlang ha katei ka sngi ki kynthup ia u Naseem Ahmad, Chairman, National Commission for Minorities, Sayeedullah Nongrum, Chairman, Organizing Committee ka Nelson Year Celebration- Shillong Muslim Union, Noor Nongrum, Secretary, Organizing Committee, Amy Yousuf, Vice Chairperson bad u Julfiqar Ali Ahmad, Convenor, Literary Committee.