Pynrem u Lat ba iap ki pulit

Shillong, 5 Naiwieng:
U Lat ka jylla Megha laya u Dr KK Paul u la pynrem jur ia ka jingshah pyniap san ngut ki pulit ha ki lehnoh ha South Garo Hills. U Lat u la phah ia ka jing sngewlem sha kiba haiing jong kito kiba khlad noh.
Ka myntri kam pohiing ka jylla ka Roshan Warjri ka la pynthikna ba ka sorkar kan leh da kaba tyngeh pyrshah ia kiba donkti ha kam.
Haba pynpaw ia ka jingsngewsih bad ka jingpynrem ia ka jingshah siat iap jong san ngut ki pulit, ka Kong Warjri ka la ong ba u Parliamentary Secretary ba peit ia ka tnad kam pohiing ka jylla u Winnerson D Sangma, bad u DGP ki la leit hiar kyrkieh wut wut sha Garo Hills ban pynlong ia ka jingjurip ia ka jinglong jingman.
Ka la pynrem jur ia ka jingjia bad pynpaw ia ka jingsngew lem sha kiba haiing jong kiba la khlad noh.
U working president ka UDP u Bah Paul Lyngdoh u la ong ba ka dei kawei pat ka jingjia ba ktah jur ia ka burom jong ki pulit ka jylla tang hapoh hynriew bnai.
U Bah Paul u la ong ba kane ka jingjia ka pyni ba ka don ka jingsynjor ka ain ka nun bad ka jingsuk ka la phet krad na ka thain Garo Hills.
U la ong ba u Myntri Rangbah mynta u la dei ban pynleit jingmut ha la iing ym ban leit shang pynban shabar ri.
“Ka sorkar jylla ka la ialam ia ki pulit ka jylla sha ka jingjah burom” la ong u working president ka UDP.
U Bah Paul u la phah ia ka khubor sngewlem sha kiba haiing jong kito kiba la khlad noh ha kane ka jingjia.
Kumjuh u MLA ka UDP na Nongthymmai u Bah Jemino Mawthoh u la ong ba ka long shisha kaba sngewsih ba ki pulit kiba don ha ka kam, kin shah pyniap ha kane ka rukom.
“Ngi pynrem jur ia kane ka jingjia”, la ong u Bah Mawthoh. Haba pynrem jur ia ka jingjia, u Bah Mawthoh u la ong ba ki pulit kiba shah pyniap ki dei kiba sah ha ka constituency jong u.