Pynrem U bah Ardent, ia ka jingkren U Bah Prestone, AL Hek halor ka ILP

Shillong: U Bah Ardent M Basaiawmoit, ula pynrem jur, ia ka jing kren tohmet ki ministers halor ka jing dawa Inner Line Permit (ILP) ka jylla Meghalaya. U nong mihkhmat barim na Nongkrem u bah Ardent M Basaiawmoit u la ong ba ka jing kren tohket u symbud myntri rangbah ka jylla u Prestone Tynsong bad u myntri ba dei khmihia ka koit ka khiah ka jylla u A. L. Hek ka pyni shai ba kane ka sorkar mynta ka long ka ba tlot khlem shyieng budlum.

U la ong ba ki jing kren jong ki arngut ki minister ka jylla ki la pyn sngewthuh bakla bad pynklumar ruh ia ki paidbah ka jylla halor ka jing dawa ILP. U la ong ruh ka long kaei kaei ka bym sngew iahap ba ki minister ba khlieh duh ka jylla kin sdang ban pynklumar jing mut ia ki paidbah wat hadien ba ka sorkar jylla ka la dep wanrah ia ka ‘resolution’ ban pyntreikam ILP hapoh ka jylla.
“Lyngba ka jing kren jong u Prestone Tynsong bad u A. L. Hek ngi lah ban sngewthuh ba ka sorkar Meghalaya kam pat mut shisha re ban wanrah ia ka jylla hapoh ka Bengal Eastern Frontier Regulation Act 1873” u la bynrap.
U la ong ruh ba ka sorkar mynta ka long ka bym don shyieng budlum ne kam nud ban ia kren bad ka sorkar India ban pyntreikam ia ka ILP hapoh ka jylla.
U bah Ardent M Basaiawmoit u kyntu ia ki paidbah ka jylla ba kim dei ban shah ialam bakla ha ki jing kren jong ki miniters bad ba ki paidbah ki dei ban long ki ba pynkhreh ban ialeh na ka bynta ban ioh ia ka ILP hapoh ka jylla.