Pynursla 12 Nailur:
Na ka liang u Bah Kalletor Khongbuh Rangbah Dong, ka Dong Neng Gate, Pynursla, mynta ka sngi u pynrem jur ia ka khubor ba la pynmih da kawei ka seng kaba la tip kum ka Senior Citizen Forum,kaba pynpaw pyrshah iaka jingweng kam jong ka tnat pulit ia u Officer Incharge ka Pynursla Police Station,u Ram Prasad Bhushal;kumba la rai da ka sur u paidbah ha ka jingialang kaba la long ha thanat ryngkat ka jingiadon lang u SDPO Sohra Bah Ian Swer ki Rangbah Shnong bad ka KSU Pynursla Unit;hadien ka jingbom pathar jong u ia ki 5 ngut ki samla na Pynursla bad ka jingshah kynnoh tuh blang, nalor kiwei ki kam sniew ba u leh kiba pynthoh bria ia ka imlang sahlang.
Hynrei ka jingpynmih khubor ka Senior Citizen Forum, mynta ka sngi ka Palei ka la pynkyndit jur ia u Bah Khongbuh uba la long ruh uwei na kiba ialam khmat ha ka ban sakhi ia ki jingsniew jinglong utei u OC. Kumta na ka liang u Bah Khongbuh, u kob ba lada katei ka Seng ka dei shisha kaba khmih iaka bha ka miat jong u paitbah ka thain Ri War, ban mih shakhmat, ha ka rynsan iatai nia bad u halor ki daw ba ki pyrshah bad halor ki daw ba u pynlong ia utei u Ophisar pulit ban shah ujor ha ki paitbah, ha kaba ma u hi (Bah Kalletor Khongbuh) un iatai nia bad ki.Haba iakren bad u Rupang u Bah Khongbuh u ong ruh”Lada katei ka seng kam don jaka , ka Dong Neng Gate Pynursla ka kloi ban ai jaka kaba ngiam haduh 500 ngut eiei, ban iasaid nia, markhmat hakhmat ka jingsakhi u paitbah bad ruh ki lad pathai khubor; ia ki daw kiba pynlong ia u ban bad kiwei kiba sngewkhia ia ka bha ka miat, haduh ban dawa wengkam noh ia u Bhushal na Pynursla”. Shuh shuh u Bah Buhphang u takrain ba lada katei ka seng kam nud kumta, ka pynpaw ba ka dei ka dur bula jongno re-jong no, ne kino re kino ki kynhun riewsniew ka thain Riwar. “Mih shakhmat lada ka Senior Citizen Forum ka long shisha ka Sengbhalang ban pynbha iaka Riwar ban iatai nia bad nga”kob shuh shuh u Bah Khongbuh.
Shuh shuh na ka liang ki paitbah ka Dong Neng Gate, ki pynpaw ka jingsngew nguh eh ia ki bor ba halor ka tnat Pulit bad kyrpang ia u Bah Ian Swer SDPO , uba kloi ban wan bishar da lade ia ka jingjia kaba tyngkhuh hapdneng ki paitbah ka thain bad utei u Ophisar pulit ba runar,ba thala thalein, uba tuh, uba tang ka dihkyiad bad kren sih kren sang, khlem da leh shilang khmat.U Bah Buhphang u pynpaw ba ka thain ka kwah ruh ban ioh da u Ophisar Pulit ha thanat Pynursla da u briew uba tipbriew tipblei, khnang ba ka kam kan iaid beit iaid ryngtih bad ba kan long shisha ka jingshngain na ka bynta u paitbah.
Phi don ban ong eiei?