Pynrem sa ka sengbhalang na Tura, ba thung CS ia U Rao

Shillong: Ka Association for Democracy and Empowerment (ADE), kaba na Tura, ka pynremjur halor ka jing thung Chief Secretary ba thymmai da u M.S Rao jong ka jylla Meghalaya. Lyngba ka kyrwoh na u president ka ADE u Dalseng Bira Ch. Momin ka seng ka la pynpaw ba kane ka jing thung da u M. S Rao kum u Chief Secretary thymmai ka jylla ka pyni ia ka jing iuhroit ia ka hok ki trai muluk ka jylla.

 Ka seng ka la kyntu ia u myntri rangbah ka jylla u Conrad K Sangma ban thung da u Hector Marwein kum u Chief Secretary ba thymmai ka jylla Meghalaya namar u long ruh u ba senior tam na ki ophisar baroh bad ba u Hector Marwein u don ia ka hok ban long u chief secretary ba thymmai ka jylla.

Ka seng ADE ka pynpaw ruh ia ka jing leh donbor u M.S Rao ha ka por ba ia khih halor ka Village Administration Bill (VAB) jong ka Khasi Hills Autonomous District Council (KHADC) , ka seng ka kynthoh ruh ba u M.S. Rao u la shim da ka rai pyrshah ia ka jing mynjur u paidbah ka jylla Meghalaya.