Pynrem ki Rangbah Shnong ia ki Lyngdoh ha ka proseshon

Shillong, 1 Naiwieng:
La iohi bad ioh sngew ba ha ka proseshon bah jong ki Rangbah Shnong kaba la long ha ka 30 tarik u risaw ba la khot da ka Synjuk Ki nong synshar Shnong ka Bri u Hynniewtrep ki nong ialam bad ki paidbah ki la pynrem jur ia u Myntri Rangbah ka jylla u Dr.Mukul Sangma bad nalor u myntri rangbah kiwei pat ba ki la pyrta kyrteng bad pynrem ha katei ka sngi ki long ia ki myntri sorkar kiba ia jan bha bad u Dr.Mukul hynrei jia ryngkhat ba kitei ki myntri sorkar bad ki nongmihkhmat paidbah kiba la shah pyrta pynrem ha katei ka sngi ki dei baroh khoit na ka Kur Lyngdoh bad kitei ki long u bah Rowell Lyngdoh, myntri ba peit ia ka Aiñ, u bah HDR Lyngdoh myntri ba peit ia ki District Council, ka kong Ampareen Lyngdoh, myntri ka tnad pynroi sor, bad la iohsngew ruh ba ki pynrem ia u shabuk rangbah ka Congress u bah Ronnie V Lyngdoh, uba dei ruh u MLA ka Mylliem Konstitwensi. Kitei kiba la shah pynrem ha ki lak ngut ki paidbah ka la leit jia ryngkhat ruh ba ki dei baroh na ka Kur Lyngdoh lait noh u myntri rangbah ka jylla u Mukul Sangma.Nangta la iohsngew ruh ba la pyrta pynrem ia baroh ki MLA bad ki myntri Khasi ha kaba ym shym la jer kyrteng ia ki bad la shu ong beit ki myntri bad MLA Khasi bad katei ka jingpyrta ka dei ha ka por ba ki lak ngut ki paidbah ki dang poi ha Assembly kaba don ha Khyndailad. Lah ban kdew ba katei ka Synjuk ka la ai por ia kitei ki myntri bad u myntri rangbah ban hiar shuki hapoh ka 4 tarik mynta u bnai bad lada jia ba katei ka jingdawa kam urlong ki lak ngut ki paidbah kumba la paw ha ka 30 tarik kin leit ban shong kyraiñ ha khyrdop bah ka Secretariat ha ka sngi kaba bud kata ha ka 5 tarik mynta u bnai.