Pynrem ki MLA Congress, ba kren bein Mukul, ki longkmie Garo

Shillong, 29 Nailur:
Ki MLA ka Congress na thain Garo hills ki la pynrem jur ia ka shah kren kynthah u myntri rangbah ha ki seng longkmie ha Garo Hill kiba khot ia u Mukul Sangma, kum u “Dr. Mukul Begum bad u A’chik Cheap Mini-star”. Ki MLA ka Congress ki sngew ba kane ka dei ka jingkren ba ktah ia ka jingsngew jong kiwei ki jaitbyn riew ruh. Ha ka jingialang jong ki MLA ka Congress na Garo Hills, ba long ha MLA hostel, ki la pynrem ia kane ka shah kren jem daw u Myntri Rangbah ha ki seng longkmie na Garo Hills.
Ha kane ka sngi Balang, ki senng longkmie kiba pynlong ia ka jingiakhih ban dawa ia ka Inner Line Permit (ILP) ki la rah da ki jingthoh plakad da kaba thoh “Dr. Mukul Begum, duplicate A’chik Cheap Mini-star.”
Ki MLA ka Congress kiba sngew rem jur ia kane ka jingthoh, ki la pynpaw ia ka jingsngew lyngngoh ia ka jingkren ia u Myntri Rangbah bad ki la kam ba ia ka jinghuri hura halor ka jingkynnoh kylla jait jong u Mukul, la dep kyntait da ka High Court bad ka Maharis ka la dep pynthikna ba u Mukul Sangma u dei na ka jait Sangma ym da ka Begum bad u dei ruh na ka tnad jait kur Manda Mahari.
Ki MLA ka Congress ki la sngew ba jingkren kynthah ka long ka bym sngew tynnad khamtam na ki briew ba la shai. U Parliamentary secretary ka Community and Rural Development u Rophul S Marak u la ong ba ki briew jong ka Khasi bad Jaintia ki la pynrem jur ia kane ka jingkren bein ia u Myntri Rangbah.
Ki MLA ki la kyntu ruh ia ka sorkar ba kan shim ia ka lynti ba tyngeh halor kane ka jingkren bein ia u myntri rangbah.