Pynrem ka UDP, halor ka jingthoh pynshit pynïapher jaitbynriew U Tagatha Roy

Shillong:Ka seng United Democratic Party (UDP) ha ka kyrwoh ba la phah da u Dr. Jemino Mawthoh uba dei u General Secretary ka UDP, u la pynpaw ia ka jingsngewkhia halor ka jingmih ki jingkynnoh kiba khlem nongrim khamtam eh ban ïoh ban pule ïa ki jingthoh jong u Lat barim ka Jylla, kiba long kum ki jingthoh kiba pynshit bad ruh kiba lah ban wanrah iaka jingiakynad hapdeng ki trai ri trai muluk khasi bad ki Bengali.

Ka UDP ka pynrem jur ïa kito ki riew pynshit kiba thmu ban thaw jingkulmar bad ruh kiba pyrshang ban wanrah ia ka jingbym don ka shongsuk shongsaiñ bad u la ong ba kum ka seng, ka kyrpad rit ïa baroh ki paidbah nongshong shnong ka Jylla ba kin long kiba husiar bad ban nym ailad ba kin ngat ha ka shrip jong ka riam buit tuh jong kine kiba pyrshang ktik ym tang ïaka mynsiem hynrei iaka jinglong kyrpang ka jong ki.

Shuh shuh, ka seng ka kyrpad ïa ki paid riewngeit Hindu, ba kin sngewbha ban wan sha khmat bad pynpaw ïa ka jingshisha bad kumjuh ïa ki seng treimon sngewbha, ba kin sngewbha ai lad ïa ia ka sorkar ban tohkit bniah halor kine kiei kiei baroh bad ba ka Sorkar jylla kan shim syndon ïa ka sienjam kaba eh bha, ban teh lakam ïa kum kine ki briew ba thaw wanrah jingkulmar ha ka jylla.