Shillong, 18 Jylliew:
Ka National People’s Party (NPP) ka la lyngngoh ngain ia ka sorkar MUA-II ba la ialam da ka Congress halor ka jingbym lah jongka ban kem ia u police officer, u Nurul Islam uba la donkti ban leh beijot ia ar ngut shipara. Ka la kynnoh ba hato utei uba shah kynnoh u don jingiadei bad u Myntri Rangbah ka jylla.
Ha ka kyrwoh ba la pynmih mynta ka sngi, na ka liang u MLA ka NPP u James K Sangma u la ong ba ka jingjia shah leh beijot jong ki ar ngut shi para ka dei ka jingjah burom khamtam ba ka la jia ha ka constituency jong u Myntri Rangbah.
U James u la ong ba ka NPP ka la pynrem ia ka jingbym lah ka sorkar MUA ban kem ia u nongshah kynnoh ba leh beijot u Nurul Islam ia ki ar ngut ki kynthei ha ka 13 tarik bad 31 tarik Lber.
“Ha jaka ban kem ia u nongleh beijot bad ban wanrah sha ka jingbishar, u Myntri Rangbah u la bunkam pynban ialade ha Delhi” la ong u MLA ka NPP.
“Ha kajuh ka por, ngi pynrem ia ka jingbym shim khia ka sorkar MUA kaba heh tang ka nia hynrei khlem leh ei ei ban tehlakam ia ki kam thombor ia ki kynthei ha kane ka jylla” la ther u James ia ka sorkar.
U la kynnoh ba ka sorkar ka khein dep tang ba la siew ia ka T. 50,000 sha kiba haiing kiba iakynduh ia ka apot.
U la ong ba kaba eh tam ia kane ka jingjia ka long ba kiba shah kynnoh kim ju shah pynshitom bad dawa ba ka sorkar ka dei ban leh da kaba tyngeh ban kem mardor ia u Islam bad kiwei kiba donkti ha kane ka kam pohjait.
Phi don ban ong eiei?