Pynrem ka NESO, ba mynjur ka sorkar India, ban pdiang ia ka CAB

Shillong: Ka North East Student’s Organisation (NESO) ka la pynrem jur ia ka jing leh bym suidniew ka sorkar National Democratic Alliance (NDA) ba lamkhmat da ka Bharatiya Janata Party (BJP) ban wanrah ia ka Citizenship Amendment Bill CAB hapoh ka dorbar thawain ka ri India ha ka taiew ban wan.

Ka NESO ka lah ong ba ka cabinet jong ka sorkar India ka lah tip ba ki paitbah ka thain lammihngi ki pyrshah jur ia ka CAB hynrei kim khein snep ia ka jing angnud ki paidbah jong kane ka thain.

“Ngi kum ka seng bad kum ki nong shong shnong jong kane ka thain lam mihngi ngi pyrshah jur ia ka jing leh bynthi ka kabinet mynta ka sngi” lah bynrap u chairman ka NESO u Samuel Jyrwa. U lah ong ruh ba ka sorkar India ka tip ba ka thain lam mihngi ka pyrshah jur ia ka CAB hynrei ka kabinet ka ai jing mynjur ban rah sha ka ing thaw ain bad kane ka jing leh jong ka sorkar ka pyni shai ba ka iuh roit ka jing ang nud ka thain lam mihngi hi baroh kawei.
U chairman ka NESO u lah ong ruh ba ka seng kan sah shong jing ialang biang ban pyrkhat lad lynti kumno ban ialeh biang ia ka jing iakhih pyrshah bad ban khanglad ia ka ing thawain ka India ban ai jing mynjur ia ka CAB.
K NESO ka lah phah kyrwoh ruh sha ka sorkar India ha ka por ba ki shah khot ban iakren ha Delhi ba lada ka CAB kan ioh jing mynjur kan sah mih ka jing klumar ha ka thain lam mihngi.