Pynrem ka KSU Umdohlun, ia ki riew shim kabu na ka surok Mawthabah

Shillong, 08 Nailur:
Ka Khasi Student Union (KSU) Umdohlun Circle ka la pynrem jur ia ki riew shim kabu kiba ialam bakla ia ki paidbah ha kaba iadei bad ka surok na  Nongstoin-Wahkaji-Mawthabah kaba jrong 68 kms na ka skhim SARDP-NE ka tnad Transports & Highway ka sorkar pdeng ba la shna ym na ka bynta ka jingmyntoi jong ki paidbah hynrei ban ioh tih ia u marpoh khyndew u  uranium.
“Ngi pynrem jur ia ka sorkar pdeng kaba ialam bakla ia ki paidbah ha ka kyrteng ka roi ka par”, la ong  la ong u Bah Shemphang Nonglang u President KSU Umdohlun Circle ha ka kyrwoh ba la pynlait ha kane ka sngi  Hatmajai. U la ong ba kane ka surok ka dei beit thik ka jingthmu ka sorkar ban suk ban ioh tih ia u uranium  ban pynjot pat ia ki paidbah.
U la ong ba lada ka sorkar ka pyrkhat ia ki jingbit jingbiang paidbah, ka surok kam dei ban pynkut tang ha Maw thabah hynrei dei ban shna shaduh Phlangmawprah, Umsaw, Nongummer bad kiwei ki shnong kiba sahdien ha kaba ki briew ki hap ban iaid kjat da ki kynta ban poi sha surok.
“Lada ka sorkar ka pyrkhat ia ka roi ka par jong ki paidbah, ki dei ban pyrkhat ban wan rah skul ha katei ka thain,, ki lad jingsumar”, la ong u Bah Nonglang bad bynrap ba ka sorkar borabor kam ju lah siew tulop thikna ia ki nongtrei ka PHC ha Wahkaji bad kiwei ki sub centre hynrei ka pahuh pisa pat ban leh ia kiei kiei na ka bynta ka jingmyntoi jongno re.
“Ngi kyntu ia ka sorkar ban nym khein mei nah ia ngi”, la ong u Bah Nonglang bad bynrap  ia ki paidbah ban nym biej ioh babe kylla.
“Ngi pyrshah jur ia ka surok na Nongstoin sha Mawthabah kaba thmu ban pynjot ia ki paidbah jong ka thain”, la ong u Bah Nonglang.