Pynrem ka KSU Mawlai, ia ka jingkren ka Kong Juliana

Shillong, 30 Natiung:
Ka KSU Mawlai Circle ka la pynrem jur ia ka jingkren bein ka Kong Juliana Kurbah ia ki shynrang Khasi kumba la paw haba ka kren ha ki nongbishar jong ka Super Mom kaba la pyni ha Zee TV hynnin ka sngi.
Haba iakren lyngba ka phun mynta ka sngi, u publicity secretary ka KSU Mawlai circle u Bah Donbaklang Sawkmie u la ong ba ka jingkren jong ka Kong Juliana ka la ktah ia ka burom ka ijot jong ki shynrang Khasi kiba niew kum u rang khad bor bad u rishot ka jaitbynriew.
Ka Kong Juliana ka la ong ba ki shynrang Khasi ki dei ki sait jain, ki pynsum khun, ki shet ja,shet jyntah bad ki bah khun.
“Kane ka jingkren jongka ka pyni ba kam tip ei ei ia ka jaitbynriew Khasi namar ba kam shong ha kane ka ri bad ka sah bad u lok jongka u bar jylla”, la ong u Samla Donboklang bad bynrap ba ka kynmaw ia ka jait ‘Mehta’ bad ka shu kam Khasi tang ban ioh vote na ki paidbah ka jylla Meghalaya.
“Ka briew kaba sah shabar jylla kam dei ban batai stad ia ka jaitbynriew Khasi” la ong u Bah Donboklang bad la kyntu ba ki paidbah ka ri Hynniewtrep kim dei ban ai vote ia kane ka longkmie ka bym tip ei ei ia ka jinglong ka jaitbynriew hynrei ka kren jem daw pynban.
“Kum ka dak ka jingpynrem ia kane ka jingkren bein, ka KSU Mawlai circle ka kyntu ia ki paid Hynniewtrep ban ym ai vote ia kane ka briew kaba thad ia ka burom bad ijot jong kane ka jait bynriew sha kiwei ki jylla”, la bynrap u Publicity secretary ka KSU Mawlai circle.