Pynrem ka Kongthong, ba shah pyniap

Shillong, 27 Jylliew:
Ki paidbah jong ka shnong Kongthong ki pynrem jur iaka jingshah pyniap dusmon jong u Rangbah Dondur Sha bong uba dei u nongshong shnong jongka shnong Kongthong. Kum ban shu pynkynmaw iaka met bymdon shuh ka kjat ka mon jong une u Rangbah la lap daki bahaiing jongu hapdeng khlaw ha Pomlum kaba dei ka jaka mar shiteng lynti na Kongthong sha Khrang ha ka 12tarik Jylliew 2014 haka por 1baje nohsngi.La antad ba u la shah pyniap haka miet 5tarik Jylliew 2014, katba u dang wanphai na shnong Khrang. Kane ka jingjia ka la pynkyndit, pynsyier bad pynsuhjer lut iabaroh ki nongshongshnong bad wat iaki shnong ba marjan ruh haduh ba kim shngain shuh ban leit bri leit lyngkha ne leit iew leit hat ruh.
Kum shibynta ban pynpaw iaka jingpyrshah bad ban pynrem iakatei ka jingjia ba sngewsangsot, U Rangbah Shnong Kongthong, u Bah Coming Home Pohnong ula khot iaka jingialang paidbah haka 21tarik Jylliew 2014, ha iing skul Kongthong Press L.P. School, Kongthong. Hakane ka jingialang la iashim bynta da palat spah ngut ki nongshongshnong kynthup iaki longkmie longkpa, samla bad ruh ki nongialam jongka Kongthong Welfare Shillong, Shillong kaba dei ka kynhun jongki nong Kongthong ba sah sha kiwei pat ki jaka bad khamtam ha Shillong. Baroh ki nongkren ki la pynrem jur iakatei ka jingleh jongki riewrunar bad ki iai ban ruh ban kyrpad jur ia ki bor Pulit, bakin shimkhia iakane ka kam da kaba pynsted iaka jingtohkit kumba la bynshet haki, khnang ban lap mano donkti hakatei ka kam pyniap briew.
Katto katne tylli ki rai ba la shim ha ka jingialang, ki kynthup ban kyrshan ia ka rai jongka KSU Khatarshnong Circle ba baroh ki nongbylla ba nabar ka thain ki dei ban mih noh shwa shipor. Yn nym shah iaki briew ba nabar ban sahmiet kulmar ha lynti syngkien, ha kali, surok khlem da pyntip shaki bor shnong.