Pynrem ka HYC Mawlai ia ka jingshah pynjulor ka kali u nongialam

Shillong: Ka HYC Mawlai circle ka pynrem jur ia ka jingjia kaba la jia ha Mawlai Mawroh ha ka miet jong ka 17 tarik Kyllalyngkot kumba ha ka por 10.30, ha kaba ka kali jong uwei u nongialam ka HYC Seng kmie la pynjulor da ki khawpud, da kaba ki la kdiah ia u Wiper, Side glass kumjuh ruh ban ot pynsniew ia baroh saw tylli ki shaka.

“Ka seng ka kwah ban ong ia kine ki khawpud kiba dait kti, phi don daw aiu ia ka seng ne ia ka kali ki nongialam jongngi. Hato ka kren ne leh aiu katei kali ia phi” ong ka kyrwoh.

Ka HYC Mawlai Circle ka maham ia kine ki khawpud ba lada ki wan pyndem noh ha kine ki khyndiat sngi, ka seng ka dang don ka jingmap ia ki. Hynrei lada kim wan pyndem ka seng, kan buddien ia baroh kiba donkti ha katei ka kam bad lada ka seng ka lap kan nym map shuh bad kan sa leh ia kaba donkam, khnang ba kine ki jingjia shah thombor ia ki nongialam bad ia ki tiar shimet jong ki dkhot ka seng kan nym jia shuh.

Ka seng ka ai jingmut ia kine ki khawpud lada ki sngew dait kti shaba palat, pyrshang ban pynjot ne ot shwa ia ki tiar ki tar la jong ne ne jong ki kmie ki kpa jongki, khnang ba kin sngewthuh ia ka dor jong katei ka jingpynjot.

Kyntang iawai, ka seng kam lah khlem da ai khublei ia ka Durbar shnong Mawlai Mawroh lyngba u Rangbah Dong jong ka Kseh Bah George E Lyngdoh bad ia ka Seng Samla Mawlai Mawroh hapoh ka jingialam u Bah Edward kiba la iadon ryngkat lang ha katei ka miet kaba la jia katei ka jingjia.